قازاقستان- يتاليا بيزنەس فورۋمىندا قۇنى 500 ميلليون دوللاردى قۇرايتىن قۇجاتتار توپتاماسىنا قول قويىلادى
بۇل تۋرالى بۇگىن ميلاندا ءوتىپ جاتقان قازاقستان- يتاليا بيزنەس فورۋمىندا ەلباسى نۇرسۇلتان نازاربايەۆ ايتتى.
«ءبىزدىڭ ەلدەرىمىز اراسىندا ساۋدا- ەكونوميكالىق، ينۆەستيتسيالىق سەرىكتەستىك تۇراقتى دامىپ كەلە جاتقاندىعىن باسا ايتقىم كەلەدى. جىل سايىن ءوزارا تاۋار اينالىمى كولەمى ارتۋدا. ەۋروپا ەلدەرى بويىنشا يتاليا ءبىرىنشى ورىندا تۇر. تولىقتاي العاندا، قازاقستان ەۋروپالىق وداقپەن 55 ميلليارد دوللارعا ساۋدا ساتتىق جاسايدى. ونىڭ 17 ميلليارد دوللارى يتالياعا تيەسىلى»، - دەدى ق ر پرەزيدەنتى.
ەلباسى ءوز سوزىندە يتاليا قازاقستان ەكونوميكاسىنا قارجى قۇياتىن ءىرى ينۆەستورلاردىڭ بىرىنە دە اينالىپ وتىرعانىن ايتتى. مەملەكەت باسشىسى العا تارتقان دەرەككە سايكەس، 2005 -جىلدان بەرى يتاليادان قازاقستان ەكونوميكاسىنا قۇيىلعان تىكەلەي ينۆەستيتسيا كولەمى شامامەن 6 ميلليارد دوللاردى قۇرادى.
«قازىرگى ۋاقىتتا ءبىزدىڭ ەلىمىزدە يتالياندىق كاپيتالى بار 200 كومپانيا بەلسەندى جۇمىس ىستەۋدە. بۇگىنگى شارا بارىسىندا تاعى دا 500 ميلليون دوللاردى قۇرايتىن قۇجاتتار توپتاماسىنا قول قويىلادى. بۇل وتە جاقسى. ودان ارى دا ءبىزدىڭ ءوزارا ءتيىمدى ىنتىماقتاستىعىمىزدى نىعايتىپ، ەكونوميكانىڭ ءتۇرلى سالالارىنداعى ءتۇيىسۋ نۇكتەلەرىمىزدى تابۋىمىز قاجەت دەپ سانايمىن»، - دەدى ن. نازاربايەۆ.
اۆتور: مارلان جيەمباي
