وڭەش وبىرىمەن نەگىزىنەن 50-60 جاستاعى ەر ادامدار كوپ اۋىرادى - ونكولوگ
س ق و كوپبەيىندى وبلىستىق اۋرۋحانا ونكولوگيالىق ورتالىعىنىڭ دارىگەرى ۆيكتور فرەشەردىڭ ايتۋىنشا، وڭەش وبىرى - ءجيى كەزدەسەتىن قاتەرلى ىسىكتەردىڭ ءبىرى.
دۇنيەجۇزىلىك دەنساۋلىق ساقتاۋ ۇيىمىنىڭ ەسەبىنشە، ول بارلىق ونكولوگيالىق اۋرۋلاردىڭ ىشىندە 6 -ورىندا تۇر.
«كوپ جاعدايدا وڭەش وبىرىمەن ەر ادامدار، سونىڭ ىشىندە 50-60 جاستاعىلار اۋىرادى. س ق و- دا قازىرگى ۋاقىتتا 74 ادام ديسپانسەرلىك ەسەپكە الىنعان. سونىڭ 47- ءسى - ەر ادام. جىلدا ورتا ەسەپپەن 30 ادامعا جاڭادان دياگنوز قويىلادى. اۋرۋدان قايتىس بولعاندار سانى ارتقان. ماسەلەن، 2021 -جىلى 10 ادام دۇنيەدەن وتسە، بىلتىر 15 ادام كوز جۇمدى. بيىل 5 ايدىڭ ىشىندە 7 ادام قايتىس بولدى»، - دەيدى ۆيكتور فرەشەر.
دارىگەردىڭ ايتۋىنشا، وڭەش وبىرىن نەعۇرلىم ەرتە انىقتاعان ءجون.
ويتكەنى، ول ەمدەۋگە وڭايلىقپەن بوي بەرمەيدى. ماسەلەن ءبىرىنشى ساتىسىندا سىرقاتتاردىڭ % 90 ەم قونسا، ءۇشىنشى ساتىسىندا تەك % 10 عانا ءتاۋىر بولادى.
«وبىردىڭ پايدا بولۋىنا نە سەبەپ؟ ءارتۇرلى تىتىركەندىرگىش فاكتورلاردان وڭەشتىڭ سوزىلمالى قابىنۋى - ەزوفاگيت پايدا بولادى، ول كەيىن قاتەرلى ىسىككە اينالادى. شىلىم شەگۋ جانە سپيرتتىك ىشىمدىكتەردى شامادان تىس پايدالانۋ، دۇرىس تاماقتانباۋ، اۋىر مەتاللدارى بار سۋسىن ءىشۋ، وڭەشتى ءتۇرلى قىشقىل، سىلتىمەن كۇيدىرۋ، زياندى وندىرىستە جۇمىس ىستەۋ، تاماقتى وتە ىستىق كۇيىندە ءىشۋ، ءوڭىشتى قاتتى تاماقپەن نەمەسە باسقا زاتپەن مەحانيكالىق زاقىمداپ الۋ - مۇنىڭ ءبارى وبىرعا اكەلۋى مۇمكىن. وڭەش راگىن باستاپقى ساتىسىندا انىقتاۋ قيىن، ىسىك پايدا بولعانشا دەيىن ادام ەشقانداي جايسىزدىقتى سەزىنبەيدى. ىسىك وسە باستاعاندا تاماقتى جۇتۋى قيىنداي تۇسەدى. العاشقى بەلگىسى دە وسى - سىرقات تاماقتى جۇتقان كەزدە بوگدە زاتتى سەزەدى. تاماق وتپەي وڭەشتە تۇرىپ قالۋى مۇمكىن. ۋاقىت وتە كەلە جايسىزدىق تەك ۇلعايا بەرەدى، ادام جۇتۋ قيىن بولعاندىقتان قاتتى تاماق جەۋدەن باس تارتادى. كەۋدەسىندە بوگدە زات تۇرعانداي بولىپ، تاماعى، ارقا تۇسى، جاۋىرىننىڭ ءۇستى اۋىرادى. ءجيى لوقسىپ، قۇسادى»، - دەيدى ۆيكتور فرەشەر.
ونكولوگتىڭ ايتۋىنشا، دۇرىس تاماقتانباعاننان ادامنىڭ دەنە سالماعى ازايادى، كۇش- قۋاتى كەمىپ، انەميا اۋرۋى پايدا بولادى.
ۇنەمى قارنى اشىپ، ءتىلى اق- سۇر تۇسكە ەنەدى ەكەن.
«اۋرۋدىڭ تاعى ءبىر بەلگىسى - كەڭىردەكتىڭ تىتىركەنۋىنەن قۇرعاق جوتەلدىڭ مازالاۋى. داۋىس قارلىعىپ، كەيىن قان ارالاس قاقىرىقتى جوتەل پايدا بولۋى مۇمكىن. اسقازان قىجىلدايدى، اۋىزدان جاعىمسىز ءيىس شىعىپ، دەنە قىزۋى كوتەرىلەدى. وڭەش وبىرىنىڭ سوڭعى ساتىسىندا اس، ءتىپتى سىلەكەي ىسىكتىڭ سالدارىنان وڭەشتەن وتپەيدى. قاتەرلى ىسىكتىڭ بۇل ءتۇرى وتە باياۋ داميدى. ءبىراق العاشقى بەلگىلەرى پايدا بولعان جاعدايدا وعان نەمقۇرايلى قاراماي بىردەن دارىگەرگە قارالعان ءجون. ال دارىگەر ونكولوگيالىق اۋرۋدىڭ بار- جوعىن انىقتاۋ ءۇشىن، وبىر بولعان جاعدايدا ونىڭ اعزاعا تارالۋ دەڭگەيىن بايقايدى. سول ءۇشىن سىرقاتتى ءبىرقاتار زەرتتەۋدەن وتكىزەدى»، - دەيدى دارىگەر.
ونكولوگتىڭ ايتۋىنشا، وڭەشتىڭ قاتەرلى ىسىگى زەرتحانالىق جانە اسپاپتىق ادىسپەن انىقتالادى. ول ءۇشىن وڭەشتىڭ رەنتگەنوگرافياسى جاسالادى.
ەندوسكوپ ارقىلى وڭەش تەكسەرىلىپ، اۋرۋ وشاعىنىڭ كولەمى انىقتالادى، زەرتتەۋ ءۇشىن ماتەريال الىنادى.
سونداي- اق كومپيۋتەرلىك توموگرافيا جاسالىپ، ىسىكتىڭ سىرتقى مولشەرىن جانە ونىڭ باسقا مۇشەلەرگە تارالۋىن بايقايدى.
بۇدان باسقا ونكوماركەرلەرگە قان ساراپتاماسى جاسالادى، قاجەت بولعان جاعدايدا برونحوسكوپيا دا ىستەلىنەدى.
«وڭەش وبىرىن ەمدەۋدىڭ بىرنەشە جولى بار. ءبىراق ول اۋرۋدىڭ ساتىسىنا، سىرقاتتىڭ جاسىنا جانە ونىڭ جالپى جاعدايىنا بايلانىستى. سونىڭ ىشىندە حيرۋرگيا - وڭەش وبىرىنىڭ ەڭ كوپ تاراعان ەمى. وتا ارقىلى وڭەشتىڭ ءبىر بولىگىن نەمەسە كوپ بولىگىن الىپ تاستايدى. ساۋلەلىك تەراپيا - راديواكتيۆتى زاتتاردى قولدانۋ ارقىلى ىسىك جاسۋشالارىن ءولتىرۋ نەمەسە زاقىمداۋ ءۇشىن قولدانىلادى. رادياتسيانى ىسىكتەردى كىشىرەيتۋ نەمەسە وپەراتسيادان كەيىن قالعان راك كلەتكالارىن جويۋ ءۇشىن قولدانۋعا بولادى. حيميوتەراپيا راك كلەتكالارىنىڭ ءوسۋىن جويۋ نەمەسە توقتاتۋ ءۇشىن ءدارى- دارمەكتەردى پايدالانۋ ارقىلى جۇرگىزىلەدى. كەيبىر حيميوتەراپيالىق پرەپاراتتار تابلەتكا تۇرىندە قابىلدانادى، ەندى ءبىرى ەكپە تۇرىندە تامىر ارقىلى تىكەلەي قانعا ەنگىزىلەدى. حيميوتەراپيا كەيدە ىسىكتى كىشىرەيتۋ ءۇشىن وپەراتسيا الدىندا قولدانىلادى»، - دەيدى ۆيكتور فرەشەر.
ال وڭەش وبىرىنىڭ الدىن الۋ ءۇشىن ونكولوگ ەڭ بولماعاندا تەمەكى مەن الكوگولدەن باس تارتۋعا كەڭەس بەرەدى.
اۆتور:
اقەركە داۋرەنبەك قىزى
