قىتاي مەن قازاقستان الداعى 5 جىلدا 50 دەن استام جوبانى جۇزەگە اسىرماقشى
بۇل تۋرالى ق ح ر- نا ساپارىنىڭ قورىتىندىسى بويىنشا سۇحبات بەرگەن ق ر ينۆەستيسيالار جانە دامۋ ءمينيسترى جەڭىس قاسىمبەك ءمالىم ەتتى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.
«بۇگىن ءبىز قىتايدىڭ مەملەكەتتىك ورگاندارىنىڭ جانە ءىرى قىتايلىق كومپانيالاردىڭ وكىلدەرىمەن ءبىرقاتار كەزدەسۋلەر وتكىزدىك. ولاردىڭ بارىسىندا ءبىرىنشى كەزەكتە ماشينا قۇرىلىسى، كولىك، تاۋ- كەن كەشەنى، اۋىل شارۋاشىلىعى ونىمدەرىن ءوندىرۋ مەن قايتا وڭدەۋ سالاسىنداعى بىرلەسكەن جوبالاردى جۇزەگە اسىرۋ ماسەلەسىنە نازار اۋداردىق. بارلىق جوبالار بارىنشا بەلسەندى جۇزەگە اسىرىلۋدا. ءبىز بيىل جانە كەلەسى جىلى ەڭ ءىرى دەگەن جوبالاردى جۇزەگە اسىرۋدى باستايمىز دەگەن ويدامىز»، - دەدى مينيستر جۋرناليستەرگە بەرگەن سۇحباتىندا.
قاسىمبەك كەلىسسوزدەر مازمۇنى جونىندە بىرنەشە ناقتى مىسالدار كەلتىردى. «ماسەلەن، ءبىز قىزىلوردا وبلىسىندا تومات پاستاسىن وندىرەتىن زاۋىت قۇرىلىسى جوباسىن، قازاقستاندا اۆتوكولىك وندىرەتىن زاۋىتتىڭ اشىلۋىن جانە وزگە دە جوبالاردى تالقىلادىق. جالپى العاندا، الداعى 5 جىلدا ءبىز 25-30 ميلليارد ا ق ش دوللارىنىڭ 50 دەن استام جوبالارىن جۇزەگە اسىرۋدى جوسپارلاپ وتىرمىز. بۇل جۇمىس وڭدەۋ سالاسىندا شىعارىلاتىن ءونىم كولەمىن ايتارلىقتاي ارتتىرۋعا مۇمكىندىك بەرەدى» ، - دەدى ول.
«بۇگىن»، - دەپ جالعاستىردى مينيستر. «ءبىز بۇل ماسەلەلەردى ق ح ر دامۋ ىستەرى جانە رەفورمالار مەملەكەتتىك كوميتەتىندە دە، بيزنەستە دە تالقىلادىق. ودان بولەك، مۇندا ق ح ر دامۋ ىستەرى جانە رەفورمالار مەملەكەتتىك كوميتەتى مەن ق ر ينۆەستيتسيالار جانە دامۋ مينيسترلىگى اراسىنداعى بىرلەسكەن كوميسسيانىڭ 11-وتىرىسى وتەدى»، - دەپ جالعاستىردى ءسوزىن ول. ءمينيستردىڭ ايتۋىنشا، جۇمىس ساپارىنىڭ ەكىنشى بولىگى كولىك جانە لوگيستيكانىڭ دامۋ ماسەلەلەرىمەن بايلانىستى بولدى.
«قىتاي كولىك مينيسترىمەن كەزدەسۋدە ءبىز قىتايدان ەۋروپاعا جانە كەرىسىنشە باعىتتا ترانزيتتىڭ دامۋ ماسەلەلەرىن تالقىلادىق. كونتەينەرلىك تاسىمال ترانزيتىنىڭ كولەمى جىل سايىن 2 ەسەگە ۇلعايۋدا. شامامەن 2020 -جىلعا قاراي كونتەينەرلىك تاسىمال كولەمى جىلىنا 1 ميلليون كونتەينەردەن اسادى دەپ بولجاپ وتىرمىز»، - دەپ باسا ايتتى مينيستر.
