شەتەلگە وقۋعا كەتكەن «بولاشاقتىقتار» مەملەكەتكە 5,4 ميلليارد تەڭگە قارىز

استانا. قازاقپارات - «بولاشاق» باعدارلاماسىمەن شەتەلگە وقۋعا كەتكەندەردىڭ قارىزى بەس جارىم ميلليارد تەڭگەگە جۋىقتاعان دەپ حابارلايدى «استانا» ارناسى.

مەملەكەتتىك شاكىرتاقىدان باس تارتقان جانە ايىرىلىپ قالعان 389 ادام رەسپۋبليكالىق كوميسسيانىڭ شەشىمىمەن شىعىندى تولىق قايتارۋى قاجەت. بۇل تۋرالى «حالىقارالىق باعدارلامالار ورتالىعىنىڭ» ماماندارى مالىمدەدى.

2005 -جىلدان بەرى «بولاشاق» باعدارلاماسىنان قول ءۇزىپ قالعاندار نەمەسە شەتەلدە قالىپ قويعانداردىڭ جالپى سانى 720 ادامعا جەتكەن. بۇگىنگى تاڭدا 331 ادام 1,8 ميلليارد تەڭگە كولەمىندەگى قاراجاتتى مەملەكەتتىك بيۋدجەتكە قايتارعان. ال قالعان 389 ادام، ياعني 5,4 ميلليارد تەڭگەنى قايتارۋ بويىنشا جۇمىستار جۇرگىزىلىپ جاتىر.

«بولاشاق» شاكىرتاقىسىنان ايىرىلۋدىڭ نەگىزگى سەبەپتەرى تومەن اكادەميالىق ۇلگەرىم مەن ەڭبەك شارتىنىڭ ورىندالماۋى، دەيدى ماماندار.

«قاراجاتتى قايتارۋ ءۇشىن سوتقا دەيىن شىعىننىڭ ورنىن تولتىرۋ تۋرالى ەلەكتروندىق پوشتا ارقىلى نەمەسە تەلەفونمەن تالاپتار قويىلادى. ودان كەيىن سوتقا شاقىرىپ، سوت ىسىنە قاتىسادى. ءۇشىنشى، سوتتىڭ شەشىمىن ورىنداۋ، ياعني جەكە سوت ورىنداۋشىسىمەن قارىزدى قايتارۋ بويىنشا جۇمىستار جۇرگىزىلەدى»، - دەيدى «حالىقارالىق باعدارلامالار ورتالىعى» زاڭ دەپارتامەنتىنىڭ باس مەنەدجەرى ۆياچەسلاۆ سارىچيەۆ.