تۇركيادا تاعى 5,3 بالدىق ءزىلزالا تىركەلدى
سىلكىنىس ەپيتسەنترى گولباشى اۋدانىندا بولعان، وشاق 8,13 كيلومەتر تەرەڭدىكتە جاتقان.
«تۇركيانىڭ وڭتۇستىك-شىعىسىنداعى ادىيامان پروۆينتسياسىندا 5,3 باللدىق جەر سىلكىنىسى بولدى. بۇل تۋرالى سەيسەنبى، 7- اقپاندا تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ جونىندەگى تۇركيا باسقارماسى (AFAD) حابارلادى. دۇمپۋلەر جەرگىلىكتى ۋاقىت بويىنشا تاڭعى 06.13 تە تىركەلدى»، - دەپ جازىلعان انادولى سايتىندا.
ايتا كەتەيىك، قازاقستان توتەنشە جاعدايلار مينيسترلىگىنىڭ قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى.
ونىڭ قۇرامىندا قازاقستاننىڭ رەسپۋبليكالىق جەدەل قۇتقارۋ جاساعىنىڭ قۇتقارۋشىلارى، مەديتسينالىق قىزمەتكەرلەر جانە قۇتقارۋشى يتتەر بار.
ءتيىستى تاپسىرمانى قازاقستان پرەزيدەنتى قاسىم-جومارت توقايەۆ بەردى. بورت ءبىرىنشى كەزەكتە گازيانتەپ قالاسىنا بارادى.
سوڭعى مالىمەت بويىنشا، تۇركيادا ءزىلزالا قۇرباندارىنىڭ سانى 3 مىڭعا جەتتى.
تۇركيا پرەزيدەنتى رەجەپ تايىپ ەردوعان ەلدىڭ وڭتۇستىك-شىعىسىندا بولعان جويقىن جەر سىلكىنىسىنە بايلانىستى 12- اقپانعا دەيىن جەتى كۇندىك ۇلتتىق ازا تۇتۋ جاريالادى.
