قازاقستاندا سوڭعى 5 جىلدا ينتەرنەتتەگى الاياقتىق كورسەتكىشى 10 ەسەگە ءوستى
دەپۋتاتتىڭ ايتۋىنشا، كەيىنگى 5 جىلدا ينتەرنەتتەگى الاياقتىق كورسەتكىشى 10 ەسەگە ءوستى. بۇعان كۇندەلىكتى ومىردە سيفرلىق جەلىلەردى كەڭىنەن قولدانۋ سەبەپ بولىپ وتىر. سوندىقتان جەكە ادامداردىڭ اتى-ءجونى جانە ولاردىڭ جەكە سايكەستەندىرۋ نومىرلەرى سياقتى مالىمەتتەر پايداكۇنەمدىك ماقساتتا پايدالانىلۋى مۇمكىن.
«اتاپ ايتقاندا، ەلىمىزدەگى بانكتەردىڭ سمارتفوندارعا ارنالعان قوسىمشالارى مەن سايتتارى كەز كەلگەن ازاماتقا ج س ن جانە جەكە كۋالىك ءنومىرى بويىنشا سالىقتار مەن ايىپپۇلدار تۋرالى اقپارات الۋعا مۇمكىندىك بەرەدى. بۇل ءوز كەزەگىندە ازاماتتاردىڭ دەربەس دەرەكتەرىن زاڭسىز پايدالانۋعا اكەلۋى مۇمكىن. ازاماتتاردىڭ قۇقىق قورعاۋ ورگاندارىنا وسىنداي جاعدايلارمەن جۇگىنۋىن مىسالعا كەلتىرۋگە بولادى»، - دەدى امانگەلدى تولاميسوۆ.
دەپۋتاتتىڭ سوزىنە قاراعاندا، ج س ن بولعان جاعدايدا سالىق بەرەشەگىنىڭ، بانكروتتىقتىڭ بولۋى، ءوندىرىپ الۋشىنىڭ اتى-ءجونى مەن ج س ن جانە سوت ورىنداۋشىسىنىڭ ۇيالى تەلەفونى ءنومىرى تۋرالى مالىمەتتەردى الۋعا بولادى. ەلىمىزدە دەربەس دەرەكتەردى بەرگەنى ءۇشىن زاڭ جۇزىندە جاۋاپكەرشىلىك كوزدەلگەنىنە قاراماستان، زاڭ تالاپتارى ءتيىستى تۇردە ساقتالماي وتىر.
«ازاماتتاردىڭ جەكە دەرەكتەرىن پايدالانا وتىرىپ، ينتەرنەت جانە تەلەفون ارقىلى الاياقتىق ارەكەت جاساۋعا قارسى ءىس-قيمىلدىڭ تيىمدىلىگىن ارتتىرۋ قاجەت. اتاپ ايتقاندا، كيبەرقىلمىسقا، ونىڭ ىشىندە ازاماتتاردىڭ جەكە دەرەكتەرىن پايدالانىپ ىستەلەتىن قىلمىستارعا كەشەندى تالداۋ جۇرگىزۋ كەرەك»، - دەدى امانگەلدى تولاميسوۆ.
