تۇرعىن ءۇي قۇرىلىس جيناق بانكىنىڭ «5-10-20» جوباسى: ءار وڭىردەگى تۇرعىن ءۇي شارشى مەترىنىڭ باعاسى اتالدى

نۇر-سۇلتان. قازاقپارات - تۇرعىن ءۇي قۇرىلىس جيناق بانكى «نۇرلى جەر» باعدارلاماسىنىڭ جاڭا باعىتى رەتىندە «5-10-20» پيلوتتىق جوباسىن ىسكە قوسادى، دەپ حابارلايدى قازاقپارات اتالعان بانكتىڭ باسپا ءسوز قىزمەتىنە سىلتەمە جاساپ.

«5-10-20» پيلوتتىق جوباسىنا تۇرعىن ۇيگە مۇقتاج رەتىندە جەرگىلىكتى اتقارۋشى ورگانداردا ەسەپتە تۇرعان ازاماتتار قاتىسا الادى. باسپانانى «نۇرلى جەر» باعدارلاماسىنىڭ اياسىندا سالىنعان جاڭا تۇرعىن ءۇي كەشەندەرىنەن دە، جەكە قۇرىلىس سالۋشىلاردان دا ساتىپ الۋعا بولادى.

قازىر جوبانىڭ شارتتارى تالقىلانىپ جاتىر جانە كەلەسى پارامەترلەر ۇسىنىلۋدا:

- نۇر-سۇلتان، الماتى جانە وسى قالالاردىڭ ماڭىنداعى ايماقتار ءۇشىن 18 ميلليون اسپايدى؛

- اتىراۋ، اقتاۋ، اقتوبە، تۇركىستان جانە قاراعاندى وبلىستارى، سونداي-اق شىمكەنت قالاسى ءۇشىن 15 ميلليون تەڭگەدەن اسپايدى؛

- باسقا ايماقتار ءۇشىن 12 ميلليون تەڭگەدەن اسپايدى. اكىمدىكتەر سالعان نەسيە تۇرعىن ءۇي بويىنشا 1 شارشى مەتردىڭ باعاسى:

240 مىڭ تەڭگەگە دەيىن - الماتى قالاسىندا؛ 220 مىڭ تەڭگەگە دەيىن - نۇر- سۇلتاندا جانە وسى قالا ماڭىنداعى ايماقتا؛

200 مىڭ تەڭگەگە دەيىن - شىمكەنت قالاسىندا جانە الماتى ماڭىنداعى ايماقتا؛

180 مىڭ تەڭگەگە دەيىن - اقتوبە، اتىراۋ، اقتاۋ، تۇركىستان جانە قاراعاندى وبلىستارىندا؛ 160 مىڭ تەڭگەگە دەيىن - باسقا ايماقتاردا. «5-10-20» پيلوت جوباسى حالىقتى تۇرعىن ۇيمەن قامتاماسىز ەتۋگە ارنالعان قوسىمشا شارا رەتىندە ازىرلەنىپ جاتىر.