الماتىدا قايتىس بولعان ايەل 4 ادامعا دونور بولدى
دارىگەرلەردىڭ ايتۋىنشا، الماتىنىڭ 53 جاستاعى تۇرعىنى ءتورت ادامنىڭ ءومىرىن امان الىپ قالدى.
ول ەكىنشى رەت ميدىڭ ولىمىنە اكەپ سوقتىرعان يشەميالىق ينسۋلتقا شالدىققان.
دونور الماتىداعى №4-اۋرۋحانادا قايتىس بولعان. اعزانى الۋ شارالارى اتالعان مەديتسينالىق مەكەمەدە جاسالدى.
«13-شىلدە كۇنى تۋىستارى مارقۇمنىڭ اعزاسىن الۋعا كەلىسىم بەردى. ونىڭ جۇرەگى 23 جاستاعى جاس جىگىتتىڭ ءومىرى ساقتاپ قالدى. وعان بۇعان دەيىن ەكى رەت وتا جاسالعان. 2013 -جىلى جۇرەك جەتكىلىكسىزدىگى دياگنوزى قويىلدى. سودان بەرى ونىڭ جاعدايى ناشارلاي ءتۇستى. جالعىز جول- جۇرەك اۋىستىرۋ بولدى. ەندى وپەراتسيادان سوڭ پاتسيەنتتىڭ ساپالى جانە ۇزاق ءومىر سۇرۋىنە مۇمكىندىگى بار»، - دەيدى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆ.
كارديولوگيا جانە ىشكى اۋرۋلار ع ز ي باسقارما ءتوراعاسى مارات پاشيموۆتىڭ ايتۋىنشا، كۇردەلى وپەراتسيا 6 ساعاتقا سوزىلدى.
وتا ۇلتتىق عىلىمي كارديوحيرۋرگيالىق ورتالىقپەن بىرلەسىپ، ەلىمىزدىڭ جەتەكشى كارديوحيرۋرگى يۋري پيانىڭ تىكەلەي باسشىلىعىمەن جاسالدى.
«الماتىدا جۇرەكتى العاشقى الماستىرۋ ۇلتتىق عىلىمي كارديوحيرۋرگيالىق ورتالىق ماماندارىنىڭ قولداۋى مەن كارديولوگيا جانە ىشكى اۋرۋلار عزي كومانداسىنىڭ ۇيلەسىمدى جۇمىسىنىڭ ارقاسىندا مۇمكىن بولدى»، - دەدى ول.
قازاق ۇلتتىق مەديتسينا ۋنيۆەرسيتەتىنە رەكتورى مارات شورانوۆتىڭ سوزىنشە، قايتىس بولعان ايەلدىڭ جۇرەگىنەن باسقا ەكى بۇيرەگى جانە باۋىرى دا الىنىپ، كەزەكتە تۇرعان ناۋقاستارعا ترانسپلانتاتسيا جاسالعان.
«قازىر ەلىمىزدە ءتورت مىڭعا جۋىق ادام اعزا اۋىستىرۋ كەزەگىندە تۇر. ونىڭ ىشىندە 147 ناۋقاس جۇرەك ترانسپلانتاتسياسى بويىنشا تىزىمگە قويىلعان»، - دەدى مارات شورانوۆ.
