بيىل 4 مىڭعا جۋىق شەتەل ازاماتىنا قازاقستاندا جۇمىس ىستەۋگە رۇقسات بەرىلدى
تولىعىراق ەڭبەك جانە حالىقتى الەۋمەتتىك قورعاۋ مينيسترلىگى كوشى- قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ايتىپ بەردى، دەپ حابارلايدى قازاقپارات ءتىلشىسى.
«شەتەلدەن كەلەتىن ەڭبەك ميگرانتتارىن ەسەپكە الۋ، ولاردى رەتتەۋ جانە زاڭداستىرۋ ءبىزدىڭ قۇزىرەتىمىزگە كىرەدى. سىرتتان ەڭبەك ميگرانتتارىن تارتۋ نارىقتىڭ سۇرانىسىنا قاراي ايقىندالادى. بيىل شەتەلدەن ەڭبەك ميگرانتتارىنا 22260 كۆوتا ءبولىندى. اتالعان شارا وتاندىق ەڭبەك نارىعىنىڭ سۇرانىسىن قامتۋمەن قاتار، زاڭسىز ەڭبەك ميگرانتىن شەكتەۋ امالدارىنىڭ ءبىرى. شەتەلدىكتەر كۆوتا ارقىلى ەلدە جۇمىس ىستەي الادى، ياعني رۇقساتپەن. بيىل 1-ساۋىردەگى جاعدايعا سايكەس ەلىمىزدە 14417 شەتەل ازاماتى جۇمىس ىستەپ جاتىر. ونىڭ ىشىندە بيىل 3790 شەتەلدىك قازاقستاندا ەڭبەك ەتۋگە رۇقسات الدى»، - دەدى ءىلياس يسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سپيكەر كەلتىرگەن مالىمەتكە سايكەس، بۇگىندە ەلىمىزدە جۇمىس بەرۋشى 1693 جۇمىس كۇشىن پايدالانىپ وتىر. وندا 407 مىڭنان استام شەتەل ازاماتى جۇمىس ىستەيدى.
«شەتەلدىك ەڭبەك ميگراتسياسىنىڭ ۇلەسى 4 پايىزدان اسپايدى. قالعانى - وتاندىق ەڭبەك كۇشى»، - دەيدى ول.
