بولاشاق باعدارلاماسىنا قۇجات قابىلداۋدىڭ اياقتالۋىنا 4 كۇن قالدى

استانا. قازاقپارات - ماگيستراتۋرا، دوكتورانتۋرا، رەزيدەنتۋرا جانە تاعىلىمداما باعدارلامالارىنا تۇسۋگە وتىنىمدەر eGov.kz مەملەكەتتىك قىزمەتتەر پورتالى ارقىلى قابىلدانادى، دەپ حابارلايدى قازاقپارات مينيسترلىكتىڭ Telegram پاراقشاسىنا سىلتەمە جاساپ.

«بولاشاق» حالىقارالىق ستيپەندياسىن تاعايىنداۋعا كونكۋرستىق ىرىكتەۋ ونلاين رەجيمىندە وتەدى جانە 3 كەزەڭنەن تۇرادى:

- كەشەندى تەستىلەۋ

- تاۋەلسىز ساراپشى كوميسسيا مۇشەلەرىمەن جەكە اڭگىمەلەسۋ

- كادرلاردى شەتەلدە دايارلاۋ جونىندەگى رەسپۋبليكالىق كوميسسيا وتىرىسىندا قۇجاتتاردى قاراۋ.

ۇمىتكەرلەر كونكۋرستىق ىرىكتەۋگە قاتىسۋ ءۇشىن 2 نەگىزگى قۇجاتتى عانا ۇسىنۋى كەرەك - «بولاشاق» بويىنشا وقۋعا ۇسىنىلاتىن جوعارى وقۋ ورىندار تىزىمىندەگى شەتەلدىك ۋنيۆەرسيتەتتەن شاقىرۋ، سونداي-اق ناتيجەسى كەمىندە B1 دەڭگەيىندەگى مەملەكەتتىك ءتىل بويىنشا ەمتيحان تاپسىرعانى تۋرالى سەرتيفيكات.