اسحات ايماعامبەتوۆتىڭ 4 وڭىردەگى مەكتەپ كىتاپحاناسىنا كوڭىلى تولمايدى

نۇر-سۇلتان. قازاقپارات - مەكتەپ كىتاپحانالارىنا اسىرەسە قازاق تىلىندەگى ادەبيەتتەردى ساتىپ الۋ كەرەك.

بۇل جايىندا ق ر وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«بۇل ماسەلەنى 2 جىل بويى ايتىپ كەلەمىز. وزگەرىس بار... بالالاردىڭ كىتاپقا قۇشتارلىعىن وياتۋ، كىتاپ وقۋعا باۋلۋ جۇمىسى نەگىزىندە وتە جوعارى دەڭگەيدە وتكىزىلىپ جاتىر. مەكتەپتەردىڭ كىتاپ قورى دا جاڭارتىلۋدا. ونىڭ ىشىندە اسىرەسە، قازاق تىلىندە ادەبيەتتەر ساتىپ الىنىپ، بالالارعا قولجەتىمدى بولۋدا. وڭىرلەرگە بارعاندا مىندەتتى تۇردە كىتاپحانالارعا كىرىپ، وسى ماسەلەنىڭ قالاي ىسكە اسىپ جاتقانىن باقىلايمىن. مىسالى، قوستاناي وبلىسىنا باردىم، كوردىم. كوپ جۇمىس جۇرگىزىلگەن. شىمكەنت قالاسىندا ۇلكەن جۇمىس جۇرگىزىلگەنىن بايقادىم. الماتى قالاسىندا دا كىتاپحانالاردا جاقسى وزگەرىس بار»، - دەدى اسحات ايماعامبەتوۆ مينيسترلىكتىڭ اپپارات جينالىسىندا.

وسى رەتتە مينيستر ەلوردادا، تۇركىستان، پاۆلودار، الماتى وبلىستارىندا مەكتەپ كىتاحانالارىنىڭ قورىن تولىقتىرۋ جۇمىستارى كوڭىل كونشىتپەيتىندىگىن باسا ايتتى.

«سوندىقتان وسى جۇمىستى دۇرىس ۇيىمداستىرىڭىزدار. بۇل مەنىڭ جەكە باقىلاۋىمدا. بۇل - پرەزيدەنت تاپسىرماسى. بۇل - بالالارعا كەرەك جوبا. بالالارعا ىڭعايلى ورتا جاساۋ كەرەك. قاجەتى ادەبي تۋىندىلاردى ساتىپ الۋ كەرەك. ءبىز بالالارعا قانداي تۋىندىلار ساتىپ الىپ بەرۋىمىز كەرەك؟ بالالارعا قىزىقتى بولۋى قاجەت. ال سىزدەر كەلەسىزدەر دە، باياعى سوتسياليزم تۋىندىلارىن، ەرەسەكتەرگە عانا قىزىقتى تۋىندىلاردى ساتىپ الاسىزدار. بالالارعا قىزىقتى كىتاپتار جوقتىڭ قاسى. قازىرگى ۋاقىتتا زاماناۋي، بالالار وقىپ جۇرگەن تۋىندىلار قايدا؟ ارينە، وبلىستاردىڭ كوپشىلىگى ءتيىستى دەڭگەيدە جۇمىس ىستەپ جاتىر. ءبىراق مەن اتاپ وتكەن 4 وڭىردە كوزىم جەتكەنىن ايتىپ وتىرمىن. الماتى، شىمكەت قالالارىندا، قوستاناي وبلىسىندا بالالارعا ەڭ قىزىقتى ادەبيەتتەر ساتىپ الىنعان. اسىرەسە قازاق تىلىندە تۋىندىلار ساتىپ الۋ كەرەك. ول قازاق تىلىندە دەگەننەن كەيىن تەك قازاق اۆتورلارى بولماۋى ءتيىس. دۇنيەجۇزىلىك، الەم ادەبيەتىنىڭ تۋىندىلارىن ساتىپ الۋ ماڭىزدى»، - دەدى ول.

اۆتور: مارلان جيەمباي