ىلە الاتاۋى پاركىندە وت جاققاندار 4 ميلليون تەڭگە ايىپپۇل تولەۋى مۇمكىن

الماتى. قازاقپارات - الماتى قالاسىنىڭ توتەنشە جاعدايلار دەپارتامەنتى ىلە الاتاۋى ۇلتتىق پاركىنىڭ تەرريتورياسىندا ءورت قاۋىپسىزدىگى شارالارىن قاتاڭ قولعا الماق، دەپ حابارلايدى قازاقپارات ءتىلشىسى.

اۋا تەمپەراتۋراسىنىڭ جوعارى بولۋىنا بايلانىستى ورمان تەرريتورياسىندا، تاۋلى ايماقتاردا ءورت قاۋپى ارتىپ وتىر. كارانتين كەزىندە 200-گە تارتا ءورت شىققان. وسىعان بايلانىستى قالالىق ت ج د، تابيعاتتى قورعاۋ پوليتسياسى مەن ىلە الاتاۋى پاركىنىڭ ينسپەكتورلارىنىڭ پاترۋلدىك باقىلاۋى كۇشەيتىلدى.

«وتكەن دەمالىستا بوستاندىق اۋداندىق ت ج باسقارماسىنىڭ قىزمەتكەرلەرى ورمان تەرريتورياسىندا وت جاققانداردى انىقتادى. 54 جاستاعى تۇرعىن وت جاعىپ، تاماق پىسىرگەن، ساماۋرىن قايناتقان»، - دەدى ت ج د باسپا ءسوز قىزمەتىنەن.

ەرەكشە كۇزەتتەگى تەرريتوريادا ءورت قاۋىپسىزدىگى شارتتارىن بۇزعان جەكە تۇلعالارعا - 100 اەك (277800 ت گ) مولشەرىندە، لاۋازىمدى تۇلعالار مەن شاعىن كاسىپكەرلەر - 250 ا ە ك مولشەرىندە، ورتا بيزنەس سۋبەكتىلەرىنە - 400 ا ە ك، ءىرى بيزنەس سۋبەكتىلەرىنە 1500 ا ە ك مولشەرىندە ايىپپۇل سالىنادى. « ۇلتتىق پارك ينسپەكتورلارى ەرەجە بۇزعان ادامعا اكىمشىلىك ايىپپۇل تولتىردى. ول 7 كۇن ىشىندە 50 اەك، 138900 تەڭگە ايىپپۇل تولەۋگە مىندەتتەلدى. وسىنداي زاڭبۇزۋشىلىقتار ءۇشىن مەدەۋ شاتقالىندا، اقساي شاتقالىندا وت جاققان ازاماتتارعا ايىپپۇل سالىندى»، - دەدى ت ج د. 2020 - جىلدىڭ باسىنان 57 دەرەك تىركەلدى، 23 اكىمشىلىك حاتتاما تولتىرىلعان.

اۆتور: گۇلميرا عوسمانالي