الەم بويىنشا كوروناۆيرۋس جۇقتىرعاندار سانى 4 ميلليوننان استى
بۇل تۋرالى دۇيسەنبى كۇنى ونلاين باسپا ءسوز ءماسليحاتىندا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس مالىمدەدى، دەپ حابارلايدى قازاقپارات.
«دەمالىس كۇندەرى ءبىز بولاشاقتا تۋىنداۋى مۇمكىن ماسەلەلەردىڭ بەلگىلەرىن كوردىك»، - دەدى گەبرەيەسۋس.
«قىتايدىڭ ۋحان قالاسىندا شەكتەۋلەر الىنىپ تاستالعاننان كەيىنگى العاشقى اۋرۋ انىقتالدى. سونداي-اق گەرمانيا شەكتەۋلەر جەڭىلدەتىلگەننەن كەيىن اۋرۋ جۇقتىرۋ وقيعاسىنىڭ كوبەيگەنى تۋرالى حابارلادى»، - دەپ اتاپ ءوتتى ول.
د د ۇ باسشىسى ەلدەردى ساقتىقپەن قاراۋعا جانە شەكتەۋلەردى الىپ تاستاماس بۇرىن ۇلتتىق دەنساۋلىق ساقتاۋ جۇيەسى اۋىرعاندار سانىنىڭ ۇلعايۋىنا توتەپ بەرۋ ءۇشىن، سونداي-اق انىقتاۋ، قاداعالاۋ جانە وقشاۋلاۋ ءۇشىن قاجەتتى رەسۋرستاردىڭ بولۋىن قامتاماسىز ەتۋگە شاقىردى.
«سەرولوگيالىق زەرتتەۋلەر كورسەتكەندەي، حالىقتىڭ از بولىگىندە COVID-19-عا قارسى انتيدەنەلەر بار. بۇل حالىقتىڭ كوپ بولىگى ۆيرۋسقا قارسى تۇرۋعا قاۋقارسىز ەكەنىن بىلدىرەدى»، - دەپ ايتىپ ءوتتى تەدروس ادحانوم گەبرەيەسۋس.
دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى الەمدە كوروناۆيرۋس جۇقتىرۋدىڭ راستالعان جاعدايلارىنىڭ سانى 4 ميلليون ادامنان اسقانىن حابارلادى.
