قاسىم-جومارت توقايەۆ الاڭداۋشىلىق تۋعىزاتىن جاھاندىق 4 ءۇردىس تۋرالى ايتتى
قاسىم-جومارت توقايەۆتىڭ ايتۋىنشا، بۇگىنگى گەوساياسي جانە گەوەكونوميكالىق وزگەرىستەرگە بايلانىستى الاڭداۋعا بارلىق نەگىز بار. ونىڭ ويىنشا، مىنا اۋقىمدى ۇردىستەر ۇرەي تۋعىزاتىن جاھاندىق احۋالعا اسەر ەتەدى: ءبىرىنشىسى - الەمنىڭ ءارتۇرلى ايماقتارىندا شەشىلمەگەن قاقتىعىستار مەن شيەلەنىستەردىڭ كوبەيۋى.
«بۇل جىككە ءبولىنۋدىڭ ەسكى باعىتتارىن جانداندىرىپ، جاڭا باعىتتارىن شىعاردى. سونىڭ سالدارىنان الەمدىك دەرجاۆالار تولىق اۋقىمدى اسكەري قاقتىعىس الدىندا تۇردى»، - دەدى قاسىم-جومارت توقايەۆ.
الاڭداۋعا تۇرارلىق ەكىنشى ءۇردىس رەتىندە ول جاھاندىق جانە ايماقتىق سۋبەكتىلەر اراسىندا سەنىم جوقتىعىن اتادى.
«بۇل قازىرگى ۋاقىتتاعى قاۋىپسىزدىك پەن قارۋدى باسقارۋ ارحيتەكتۋراسىنىڭ بۇزىلۋىنا اكەلىپ، قايتادان قارۋلانۋ جارىسىنىڭ باستالۋىنا سەبەپ بولادى. اتالعان جاعداي شەكتەۋلى سانكسيالار، ساۋدا سوعىستارى، عارىش، كيبەر تەحنولوگيالار جانە جاساندى ينتەللەكت سالاسىنداعى قارقىندى قاراما-قايشىلىقتا شيەلەنىسە تۇسۋدە. مۇنىڭ ءبارى - تەرەڭدەپ بارا جاتقان داعدارىستىڭ الاڭداۋشىلىق تۋدىراتىن شەگى»، - دەيدى ق ر پرەزيدەنتى.
مەملەكەت باسشىسىنىڭ پىكىرىنشە، الاڭداۋشىلىق تۋدىراتىن تاعى ءبىر ءۇردىس - سولتۇستىك پەن وڭتۇستىك اراسىنداعى تەڭسىزدىكتىڭ كۇشەيۋى، الەۋمەتتىك-ەكونوميكالىق جانە تەحنولوگيالىق تەڭسىزدىك.
«مۇنىڭ ءبارى جاھاندىق قارىز داعدارىسىمەن بىرگە قازىرگى الەمدىك ەكونوميكالىق لاندشافتتى بۇرمالايدى. ءبىز حالىقارالىق سەرىكتەستىك پەن ىنتىماقتاستىقتى بۇزاتىن پروتەكتسيونيزم مەن ۇلتشىل ساياساتتىڭ ءوسىپ كەلە جاتقانىن كورىپ وتىرمىز»، - دەيدى توقايەۆ.
«تورتىنشىدەن، قورشاعان ورتانىڭ قۇلدىراۋى - جاھاندىق دەڭگەيدە تۇراقسىزداندىراتىن فاكتورلاردىڭ ءبىرى. كليماتتىڭ، اسىرەسە ورتالىق ازياداعى كليماتتىڭ وزگەرۋ سالدارى ومىرىمىزگە قاۋىپ ءتوندىرۋى مۇمكىن. بۇل - شولەيتتەنۋ، مۇزدىقتاردىڭ ەرۋى، اۋىزسۋ مەن سۋارۋ كوزدەرىنىڭ سارقىلۋى. وسىنداي قيىن جاعداي ورىن الىپ تۇرعان كەزدە قازاقستان ينكليۋزيۆتى دامۋدى، جان-جاقتى ديالوگتى جانە بەيبىتشىلىك ءۇشىن كۇش بىرىكتىرۋدى قولدايدى»، - دەيدى ول.
