الماتى وبلىسىندا 4 جاستاعى بالا بالاباقشانىڭ تەرەزەسىنەن ءۇي شاتىرىنا شىعىپ كەتتى
وقيعا قاپشاعاي قالاسىنداعى «اقديدار» بالاباقشاسىندا بولعان، دەپ حابارلايدى قازاقپارات ءتىلشىسى.
بالاباقشا شاتىرىنا 4 جاستاعى بالانىڭ شىعىپ كەتكەنى تۇسىرىلگەن بەينەجازبا بىردەن الەۋمەتتىك جەلىگە تاراپ، حالىقتىڭ نارازىلىعىن تۋدىردى.
شاتىردىڭ ۇستىندە جۇرگەن ءبۇلدىرشىندى دەرەۋ تاربيەشى بايقاپ، بالانىڭ ارتىنان ءوزى دە شاتىرعا شىعىپ، كومەككە ۇمتىلعان. بالاباقشا مەڭگەرۋشىسىنىڭ سوزىنشە، بالا جاتىن بولمەنىڭ تەرەزەسىن اشىپ، سىرتقا شىعىپ كەتكەن. وقيعا قىركۇيەكتىڭ ەكىسى كۇنى تاڭعى ساعات 8:15-تەر شاماسىندا بولعان.
«بالا ومىرىنە قاۋىپ تونگەن جوق. وسى وقيعادان كەيىن بالانىڭ اناسىن شاقىرىپ، بولعان وقيعا جايلى ايتتىق. ول كىسى بالاسىنىڭ مازاسىز ەكەنىن، ەركە ەكەنىن جەتكىزدى. ۇيدە دە وسىعان ۇقساس وقيعالاردىڭ بولعانىن ايتىپ بەردى. توپ تاربيەشىسىنە تارتىپتىك جازا قولدانىپ، قاتاڭ سوگىس بەرىلدى. ال بالاباقشا ەكى قاباتتان تۇرادى. ەكىنشى قاباتتا 8 توپ ورنالاسقان. سول توپتاردىڭ تەرەزەسىنە تەمىر تور قويۋعا توتەنشە جاعدايلار رۇقسات بەرمەيدى»، - دەدى «اقديدار» بالاباقشاسىنىڭ مەڭگەرۋشىسى گۇلزادا اقىنبەكوۆا.
«اقديدار» - مەملەكەتتىك بالاباقشا. بۇل جەردە 370 بالا تاربيەلەنىپ جاتىر. ال تاربيەشىلەر سانى 35.
اۆتور: سامال قابىشەۆا
