بيىل قازاقستاندا 4 تۇرمە جابىلادى
وعان سوڭعى 8 جىلدا ەلدەگى سوتتالعانداردىڭ سانى 50 پايىزعا ازايۋى سەبەپ بولعان، دەپ حابارلايدى قازاقپارات ءتىلشىسى.
ىشكى ىستەر ءمينيسترى ەرلان تۇرعىمبايەۆتىڭ ايتۋىنشا، 2000 -جىلى قازاقستان حالىقارالىق تۇرمە رەيتينگى بويىنشا 3-ورىندا تۇرعان. 19 جىلدىڭ ىشىندە سوتتالعانداردى قامتاماسىز ەتۋگە قولايسىز دەپ تانىلعان 8 تۇرمە جابىلىپ، 2019 -جىلعى رەيتينگ بويىنشا 95-ورىنعا تۇسكەن.
«وسى جىلى 4 تۇرمەنى جابۋ جوسپارلانىپ وتىر. سوتتالعانداردى جەكە كامەرالارعا اۋىستىرۋ جۇمىستارى ءجۇرىپ جاتىر. سوڭعى جىلدارى قىزىلورداداعى كولونيا مەن الماتىداعى ءتىنتۋ يزولياتورى، سونىمەن قاتار ورالداعى ەكى كولونيا مەن الماتى وبلىسىنداعى ءبىر كولونيا جاڭادان قالپىنا كەلتىرىلدى. قامالعاندار مەن سوتتالعانداردىڭ قاۋىپسىزدىگى ءۇشىن مەكەمەلەردىڭ بارلىق جەرىنە بەينەكامەرا ورناتۋ باستالدى» - دەيدى مينيستر.
ول سونداي-اق، قىلمىستىق اتقارۋ جۇيەسى مەن پروباتسيا قىزمەتكەرلەرى دە بەينەتاسپامەن قامتاماسىز ەتىلەتىنىن اتادى.
«سوتتالعانداردىڭ وتىنىشتەرىن ەلەكتروندى تۇردە جولداۋ جولعا قويىلماق. بۇل ءۇشىن مەكەمەدە ءتيىستى تەرمينالدار ورناتىلادى. مەكەمە قىزمەتكەرلەرىن بەينەتىركەگىشتەرمەن جابدىقتاۋدى جوسپارلاپ وتىرمىز. ءبىزدىڭ باستامامىز بويىنشا، سوتتالعانداردى مەديتسينالىق كومەكپەن قامتاماسىز ەتۋ ءىسى دەنساۋلىق ساقتاۋ مينيسترلىگىنىڭ قاراماعىنا بەرىلۋى مۇمكىن. الماتى جانە قاراعاندى وبلىستارىندا وسى ماسەلە بويىنشا ىلكىمدى جوبا قولعا الىندى. سوتتالعانداردىڭ ەڭ قاجەت تاۋارلاردى ەلەكتروندى دۇكەندەردەن ساتىپ الۋىنا، تۋىستارىمەن بەينە سۇحباتتاسۋىنا مۇمكىندىك بەرەتىن بىرنەشە سيفرلىق جوبا ازىرلەنىپ جاتىر. العاشقى جوبا اقمولا وبلىسىندا ىسكە قوسىلدى» - دەدى ەرلان تۇرعىمبايەۆ.
ەسكە سالساق، بۇگىن ەلوردادا قىلمىستىق اتقارۋ جۇيەسىن رەفورمالاۋ ماسەلەسىن ارنالعان اشىق ديالوگ فورماتىنداعى فورۋم ءوتىپ جاتىر. شارا بارىسىندا ق ر باس پروكۋرورىنىڭ ورىنباسارى مارات احمەتجانوۆ ەلدەگى تۇرمەلەردىڭ 80 پايىزدان استامى ەسكىرگەنىن ايتقان بولاتىن.