تۇركىستان وبلىسىندا 4 ازىق-تۇلىك بەلدەۋى ىسكە قوسىلادى
مۇنداعى ماقسات - الەمدەگى وزىق تەحنولوگيالاردى، وزىق اگروتەحنولوگيالاردى، توپىراقتى وڭدەۋدىڭ وزىق تەحنولوگيالارىن پايدالانا وتىرىپ، ەڭبەك ونىمدىلىگىن 2,5 ەسەگە ارتتىرۋ. بۇل تۋرالى بۇگىن ورتالىق كوممۋنيكاتسيالار قىزمەتى ۇيىمداستىرعان كوشپەلى بريفينگتە وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ مالىمدەدى.
ونىڭ سوزىنشە، بۇل جوبالار عالىمداردىڭ سۇيمەلدەۋىمەن جۇزەگە اسىرىلادى.
«وبلىس اكىمىنىڭ تاپسىرماسىنا سايكەس تۇركىستان قالاسىنىڭ اينالاسىنان راديۋسى 20 شاقىرىم جەردە ازىق-تۇلىك بەلدەۋىن قالىپتاستىرۋ جوباسىن ىسكە اسىرۋ بويىنشا ناقتى تاپسىرمالار قويدى. سول تاپسىرمانىڭ اياسىندا قازىرگى تاڭدا 20 مىڭ گەكتار جەر انىقتالدى. سونىڭ ىشىندە ءبىرىنشى كەزەڭىندە تۇركىستان-شىمكەنت باعىتىندا مىڭ گەكتار القاپقا وسى ازىق-تۇلىك بەلدەۋىن قالىپتاستىرۋ جوباسى باستالىپ كەتتى. ال، كەلەر جىلى ءبىزدىڭ تۇركىستان - قىزىلوردا، تۇركىستان - وتىرار، تۇركىستان - كەنتاۋ باعىتىندا جالپى 14 مىڭ گەكتار القاپتا ىسكە اساتىن بولادى»، - دەدى باسقارما باسشىسى.
قازىرگى تاڭدا شاعا اۋىلدىق وكرۋگىندە جالپى 121 سۋبەكتىدەن تۇراتىن ارنايى «ىنتىماق» اۋىل شارۋاشىلىعى وندىرىستىك كووپەراتيۆى قۇرىلىپ وتىر. بۇل مىڭ گەكتار القاپتا جالپى جاڭبىرلاتىپ سۋارۋ تەحنولوگياسىمەن 400 گەكتار جەرگە داندىك جۇگەرى داقىلى ەگىلەدى. 400 جەرگە سۇرلەندىك جۇگەرى جانە 200 گەكتار اۋماقتا جوڭىشقا داقىلى ەگىلەدى. الىنعان ءونىم اتالعان كووپەراتيۆكە جەتكىزىلىپ، قايتا وڭدەلەدى.
