قورعاستان الماتىعا دەيىن جۇك جەتكىزۋگە بار جوعى 4 ساعات كەتەدى

استانا. قازاقپارات - قازاقستان مەن قىتاي شەكاراسىنداعى «قورعاس» بەكەتى ارقىلى وتەتىن ەكسپورت پەن يمپورت كولەمى جىل سايىن ارتىپ كەلەدى، دەپ حابارلايدى «حابار 24».

 بيىلعى 9 ايدىڭ وزىندە تاۋار اينالىم كولەمى 14 ميلليارد ا ق ش دوللارىنا جەتكەن. بۇل وتكەن جىلمەن سالىستىرعاندا، 21 پروتسەنتكە ارتىق.

-  قىتايدان قازاقستانعا قاراي نەگىزىنەن ەلەكترونيكا، توقىما بۇيىمدارى، جەمىس- جيدەك پەن كوكونىستەر كەتىپ جاتىر. ال كەرى باعىتتا تابيعي گاز، ءجۇن، كەبەك، سويا جانە قىزىل ميا جونەلتىلەدى ەكەن. 2018 -جىلدىڭ 9 ايىندا شىنجاڭ- ۇيعىر اۆتونومدى اۋدانىنان شىققان جالپى جۇك كولەمىنىڭ 60 پايىزى «قورعاس» ارقىلى وتكەن. جاڭا اۆتوماگيسترال مەن «نۇر جول» باقىلاۋ بەكەتىنىڭ اشىلۋى تاۋار تاسىمالىن جىلدامداتا تۇسكەن. «ماسەلەن، قورعاستان الماتىعا دەيىن جۇك جەتكىزۋگە بار جوعى 4 ساعات كەتەدى»، -  دەيدى قىتايلىق كاسىپكەر يۋي حۋان.

 ونىڭ ايتۋىنشا، تاڭەرتەڭ قىتاي جەرىندە تۇسىرىلگەن كوكونىستەر تۇستەن كەيىن قازاقستان بازارىندا تۇرادى. سونىمەن قاتار قورعاس كەدەن بەكەتى تەمىرجولمەن تاسىمالدانعان تاۋار كولەمىنىڭ ارتقانىن ايتادى.

 ليۋ ۆانشەن، «قورعاس» كەدەنىنىڭ قىزمەتكەرى:

 -  قورعاستىڭ تەمىرجول باقىلاۋ بەكەتىنەن وتەتىن جۇك كولەمى جىل سايىن ارتىپ كەلەدى. كۇنىنە 20 پويىز جونەلتەمىز. بۇل شامامەن 900 كونتەينەر دەگەن ءسوز. وسى جەردەن ۇزدىكسىز ورتالىق ازيا ودان ءارى ەۋروپاعا اتتانىپ جاتادى.

 قىتايدىڭ قورعاستاعى كەدەندىك قىزمەتى تاراتقان مالىمەتكە سايكەس، بيىل قازان ايىنا دەيىن 3761 پويىز قاتىناعان. بۇل وتكەن جىلدىڭ وسى كەزەڭىمەن سالىستىرعاندا، 65 پايىزعا ارتىق. ەكسپورت پەن يمپورت كولەمى 386 مىڭ توننانى قۇرادى.

 اۆتورى: نۇربەك بەكەن

www.24.kz