قازاقستاندا دروندار 4 وبلىستىڭ اۋماعىندا پوشتا تاسىمالداپ ءجۇر

استانا. قازاقپارات - «قازپوشتا» حات-حاباردى درونمەن تاسىمالداۋ باعىتىن جەتىلدىرەدى.

بۇل تۋرالى بۇگىن «سيفرلىق قازاقستان» باعدارلاماسىن جۇزەگە اسىرۋعا ارنالعان كونفەرەنسيادا «قازپوشتا» ا ق ترانسفورماتسيا جانە IT جونىندەگى باسقارۋشى ديرەكتورى ناريمان مۇقىشەۆ ءمالىم ەتتى، دەپ حابارلايدى قازاقپارات.

«بىزدەگى نەگىزگى جوبالارعا توقتالاتىن بولسام، بىرىنشىدەن، ءبىز درونداردى ۇشىردىق. قازىرگى كەزدە 10 درون 4 وبلىستىڭ اۋماعىندا ۇشىپ ءجۇر. بۇل ءوز كەزەگىندە «سيفرلىق قازاقستان» باعدارلاماسىمەن جۇزەگە اسىرىپ جاتقان شارالاردىڭ ءبىرى. اتاپ ايتقاندا، ءبىز وسى جوبا اياسىندا جۇكتى جەتكىزۋ ۋاقىتىن قىسقارتىپ وتىرمىز. كەيبىر اۋىلدى جەرلەرگە كولىكپەن جەتۋ قيىندىق تۋعىزادى. بۇل رەتتە درونمەن حات-حاباردى وڭاي باعىتتاي الامىز»، - دەدى ن. مۇقىشەۆ.

ونىڭ سوزىنە قاراعاندا، پوشتانى درونمەن جەتكىزۋ جوباسى ءوزىن اقتاپ كەلەدى. بەلگىلى بولعانداي قازپوشتا 1,5 توننا بولاتىن حات-حاباردى درون ارقىلى تاسىمالدادى.

«ءبىز بۇل باعىتتا ارى قاراي دامىتپاقپىز. سەبەبى بۇل سالا تەحنولوگيا مەن ىشكى وپەراتسيالىق شارالاردى جەتىلدىرۋدە ماڭىزدى ءارى قىزىقتى باستاما»، - دەدى ناريمان مۇقىشەۆ.

ەسكە سالا كەتسەك، وتكەن جىلدىڭ قىركۇيەك ايىندا ەكى كەلىگە دەيىن جۇك كوتەرەتىن پوشتالىق دروندار ۇشىرىلعان ەدى.

اۆتور: رۋسلان عابباسوۆ