بۇگىن قۇتقارۋ قىزمەتتەرىنە 4 مىڭنان استام قوڭىراۋ تۇسكەن

 استانا. قازاقپارات - ق ر ءى ءى م توتەنشە جاعدايلار كوميتەتى ەلدەگى بورانعا بايلانىستى جۇرگىزىلىپ جاتقان جۇمىستار جايىندا ەسەپ بەردى، دەپ حابارلايدى «قازاقپارات» ح ا ا ءتىلشىسى، ۆەدومستۆونىڭ رەسمي وكىلى رۋسلان يمانقۇلوۆقا سىلتەمە جاساپ.

استاناداعى «نۇرسۇلتان نازاربايەۆ» اۋەجايىندا تاڭەرتەڭگى 7 دەن باستاپ بارلىق اۋە رەيستەرى توقتاتىلدى. ساعات 01.00 دەن بارلىق باعىتتار بويىنشا بارلىق كولىك تۇرلەرى قوزعالىسىنا شەكتەۋ قويىلدى.

 «112» پۋلتىنە 2000 عا جۋىق قوڭىراۋ كەلىپ ءتۇستى، ولاردىڭ كوبى اقپاراتتىق سىڭايداعى قوڭىراۋلار. زارداپ شەككەندەر جوق.

اقمولا وبلىسىندا تاڭەرتەڭگى 8-30 دان باستاپ، بارلىق كولىك تۇرلەرى بويىنشا، بارلىق باعىتتارعا جول جابىلدى.

قۇتقارۋ قىزمەتىنە 1180 قوڭىراۋ تۇسكەن. زارداپ شەككەندەر تۋرالى اقپارات جوق. ارشالى، استراحان، ەرەيمەنتاۋ، سەلينوگراد، شورتاندى اۋداندارى ماڭايىندا 100 دەن استام كولىكتىڭ جينالىپ قالعانى بايقالدى.

قاراعاندى وبلىسىندا ساعات تاڭعى 8 دەن بارلىق كولىك تۇرلەرى بويىنشا، بارلىق باعىتتارعا جول جابىلدى. «112» نومىرىنە 1300 دەن استام قوڭىراۋ ءتۇستى. ۇلىتاۋ، اباي، شەت اۋداندارىندا اپاتتىق- قۇتقارۋ ءىس- شارالارى جۇرگىزىلىپ جاتىر.

 سونداي- اق، بۇگىن ساعات 10:30 دان باستاپ اۋا رايىنىڭ ناشارلاۋىنا بايلانىستى « قىزىلوردا- پاۆلودار- ۋسپەنكا- رف شەكاراسىنا دەيىن» رەسپۋبليكالىق ماڭىزداعى اۆتوجولىنىڭ ۋچاسكەسىندە (12-216 شاقىرىم ارالىعى،  قىزىلوردا قالاسى- قاراعاندى وبلىسىنىڭ شەكاراسى) بارلىق كولىك تۇرلەرى ءۇشىن قوزعالىس توقتاتىلدى