گەرمانياداعى قازاق دارىگەرى 4 مىڭنان استام كۇردەلى وپەراتسيا جاساعان
مەديتسينا عىلىمدارىنىڭ دوكتورى جادىك شەنولدىڭ ەسىمى گەرمانيادا كەڭ تارالعان. ءاليا، ءنايلا، رانا جانە مۇحامماد ءۇشىن جادىك شەنول قاراپايىم اكە بولسا، گەرمانيا قوعامى ءۇشىن بۇل ەسىمنىڭ اتاعى زور. جەتى ءتىلدى جەتىك بىلەتىن كيل ۋنيۆەرسيتەتى اۋرۋحاناسىنىڭ نەيروحيرۋرگى جادىك شەنول - قازاقستاندا كوپ بولماسا دا، انا ءتىلىن ۇمىتپاي، ۇلىقتاپ جۇرگەن ازاماتتاردىڭ ءبىرى. ءتىل عانا ەمەس، بىلىكتى قازاق ازاماتى - ادامنىڭ ەڭ كۇردەلى ءارى قۇدىرەتتى اعزاسى - مي جانە ميدىڭ سان ءتۇرلى تامىرىنا وتا جاسايتىن ەۋروپاداعى بىلىكتى بىرەگەي مامان. ول ازيا، امەريكا ەلدەرىنە دە ءجيى بارىپ، وسى سالاداعى تانىمىن تەرەڭدەتۋ جولىندا تىنىمسىز تەر توگىپ كەلەدى.
«نەيروحيرۋرگيادان باستالعان تاجىريبەمە 20 جىلعا جۋىق ۋاقىت بولدى. مەن بارلىعىن تىزبەكتەپ وتىرامىن. قازىرگە دەيىن 4 مىڭنان استام اۋرۋعا نەيروحيرۋرگيالىق وتا جاسادىم. ونىڭ ىشىندە ميدىڭ ىسىكتەرى، ميدىڭ تامىرىنداعى اۋرۋلار، ميعا قان قۇيىلعان جاعدايلاردا جاسايمىن. سونىمەن قاتار گيدروتسەفاليادا، ياعني جۇلىنداعى اۋرۋلاردا دا وپەراتسيا جاساعان كەزدەرىم كوپ» ، - دەيدى مەديتسينا عىلىمدارىنىڭ دوكتورى جادىك شەنول.
جات ەلدە دۇنيەگە كەلگەنىنە قاراماستان، دارىگەردىڭ ءتورت قۇلىنى دا قازاق ءتىلىن جەتىك بىلەتىن بولىپ شىقتى. قازاقشا ءاندى دە ناقىشىنا كەلتىرىپ ورىندايدى. جالپى بالا دەگەندە، جانى بولەك جادىك اعا قازاق بالالارىنا بۇيرەگى بۇرىپ تۇراتىنىن جاسىرمادى. كەيبىرىن ءتىپتى تەگىن ەمدەسە كەرەك. ەلدەن كەلگەن ناۋقاس جول، اۋرۋحاناداعى جاتىن ورىن مەن ءدارى- دارمەك شىعىنىن وتەسە جەتكىلىكتى.
ءتىلى نەمىسشە تازا، الايدا ءتۇرى مەن قويۋ قارا شاشىنا قاراپ، الەمنىڭ ءار تۇكپىرىندەگى ناۋقاستار «ۇلتىڭىز كىم؟ » ، - دەپ سۇرايدى ەكەن كەيدە. مۇنداي ساتتە دارىگەر «قازاقپىن» ، - دەپ ماقتانىشپەن جاۋاپ بەرەتىنىن ايتادى.
