قازاقستان مەن قازاقستاندىقتاردان كوڭىلى قالعان تۋريستەر: 4 وقيعا

ال كەيىنگىلەرى ءوز كەزەكتەرىندە زاڭسىز ايىپپۇل سالىپ، پارا تالاپ ەتەدى ەكەن. بۇعان شاكىر يسلامباكيەۆ ناقتى مىسالدار كەلتىردى.
بۇل تۋرالى Stan.kz حابارلايدى.
قازاقستانداعى ءتۋريزمنىڭ ءالى كۇنگە دەيىن قارقىندى دامىماي جاتقانى بەلگىلى. شەتەلدىكتەر عانا ەمەس، وتانداستارىمىز دەمالىس كەشەندەرىنىڭ تىم قىمبات ەكەنىن ايتىپ جاتىر. ولار قىزمەت كورسەتۋ ساپاسىنىڭ دا تومەن ەكەنىن دە تىلگە تيەك ەتتى. مۇنىمەن قاتار، شەتەلدىك قوناقتار پوليتسيا قىزمەتكەرلەرىنىڭ وزدەرىن ءجونسىز توقتاتىپ، پارا سۇرايتىندارىنا نارازى. ولاي بولسا، پوليتسيا قىزمەتكەرلەرىنىڭ ورىنسىز ايىپپۇل تاعايىنداعان بىرنەشە وقيعانى ۇسىنامىز.
شاكىر يسلامباكيەۆ - الماتىداعى كىشىگىرىم قوناق ۇيلەردىڭ ءبىرىنىڭ يەسى. ول قوناق ۇيىنە توقتاعان تۋريستەردىڭ باسىنان وتكەن بىرنەشە وقيعانى بايانداپ بەردى.
قازاقستاننىڭ زاڭدارى تەك شەتەلدىكتەر ءۇشىن جازىلعان با؟
جاڭا جىل قارساڭىندا جاڭا زەلانديادان ەلىمىزگە قوناق كەلدى. روجدەستۆو مەرەكەسىنە وراي، 28 پانفيلوۆشىلار ساياباعىنداعى شىركەۋگە بارعان. ساياباقتان شىعىپ بارا جاتىپ شىلىم تۇتاتقان. شىلىم شەگۋگە بولمايدى دەگەن بەلگىنى كورمەگەن ەكەن. ونىڭ ۇستىنە الگى بەلگى ساياباقتىڭ سىرتىندا، كوشە بويىندا جازىلىپ تۇرعان. جەرگىلىكتى جاستار دا شىلىم شەگىپ تۇرعان-دى. نەگە ەكەنى بەلگىسىز پوليتسيا قىزمەتكەرلەرى تەك شەتەلدىككە ايىپپۇل سالعان. بىلۋىمشە، زاڭدا ناقتى ساياباقتارعا قاتىستى جازىلماعان.
وسىلايشا پوليتسيا اعىلشىن ءتىلدى تۋريستى ەكى ساعات بويى ۇستاعان. قانداي زاڭدى بۇزعانىن تۇسىنبەگەن تۋريست ماعان حابارلاستى. مەن قوناق ۇيدەگى پاسپورتىن الىپ سول جەرگە باردىم. يمميگراتسيالىق كارتاسىن كورسەتىپ، قازاقستاندا زاڭدى جۇرگەنىن دالەلدەدىم. سول جەردە پروتوكول تولتىرىپ، اشىق تۇردە پارا تالاپ ەتتى. زاڭدى تۇردە ايىپپۇلدىڭ 30000 تۇراتىنىن جانە ونىڭ ورنىنا ازىراق سومانى وزدەرىنە بەرە سالۋعا بولاتىنىن ايتقان. شەتەلدەن كەلگەن قوناعىمىز قاتتى اشۋلانىپ، قاجەت بولسا ۋچاسكەگە اپارۋىن سۇرادى. سوڭىندا پوليتسەيلەر پاسپورتىن بەرىپ، ونى بوساتتى.
قازاقستاندا ءمۇسىندى سۋرەتكە تۇسىرۋگە بولمايدى
الدىڭعى كۇنى تاعى ءبىر كەلەڭسىز وقيعا بولدى. تۋريست ءال-فارابي كوشەسىنىڭ بويىندا تۇرعان ءشوپ ءمۇسىندى سۋرەتكە تۇسىرگەن. وسى ساتتە ءوزى كوپىردىڭ ۇستىندە تۇرعان. وعان پوليتسيا وكىلدەرى كەلىپ، ءمۇسىندى سۋرەتكە تۇسىرۋگە بولمايتىنىن ايتقان. ارتىنشا قۇجاتتارىن تالاپ ەتكەن. شەتەلدىك قوناعىمىز كەشىرىم سۇراپ، سول ساتتە قاشىپ كەتكەن ەكەن. بۇعان قاراماستان قولىنان قولتىقتاپ، قىسىم كورسەتپەك بولعان.
الماتى كولىندە شەكاراشىلار تۋريستەرگە سەس كورسەتەدى
ۇلكەن الماتى كولىنە باراتىن ءاربىر تۋريست تە ءدال وسىنداي قيىندىققا تاپ بولادى. ولارعا شەكاراشىلار كەلىپ زاڭدى بۇزعاندارىن ايتادى ەكەن. ءتىپتى، اۆتوماتپەن قورقىتاتىن كەزدەرى دە بولادى. ياعني «شەتەلدىڭ تەرريتورياسىنا اياق باستىڭ» دەپ ايىپتايدى. مەن سول جەرگە باراتىن ءاربىر تۋريسكە ەسكەرتۋ جاساپ وتىرامىن. اسىرەسە، قانداي جاعداي بولماسىن، اقشا بەرمەۋگە كەڭەس بەرەمىن. ونىڭ ۇستىنە كولدىڭ ماڭىندا ارنايى بەلگىلەر جوق. 1000-2000، 5000 كولەمىندە پارا بەرگەندەر بار. وكىنىشكە وراي، ەلىمىزدىڭ زاڭدارىن جەتىك بىلمەيدى. ءتىپتى، قانداي ەرەجەنى بۇزعاندارىن تۇسىنبەيدى.
كىم كىنالى؟
ءبىر تۋريست ارگەنتينادان ۇشىپ كەلدى. وعان قازاقستان قاتتى ۇنادى. بارلىق دوستارىنا ەلىمىزدى ماقتاپ جازدى. دوستارىنا مىندەتتى تۇردە كەلۋگە كەڭەس بەردى. ونى رەسەي مەن قازاقستان شەكاراسىندا ۇستاپ قالعان ەكەن. ول پەتروپاۆل ارقىلى ۇشقان بولاتىن. تۋريسكە «ميگراتسيالىق قۇقىقتى بۇزدى» دەگەن ايىپ تاعىلعان. الايدا ول الماتىعا ميگراتسيالىق پوليتسياعا بارعان بولاتىن. پوليتسيا وكىلدەرى قۇجاتتاردىڭ دۇرىستىعىن ايتىپ، ەش انىقتاما بەرمەگەن.
وكىنىشكە وراي، الگى تۋريست قازاقستاننان ءوز ەلىنە دەپورتاتسيالاندى. ەندى ەلىمىزگە 5 جىل بويى كەلە المايدى. بولعان وقيعانىڭ سەبەبى دە ءالى كۇنگە دەيىن تۇسىنىكسىز. ءبىر قىزىعى، ءدال وسىلاي تاعى ءبىر قوناق ارگەنتينادان ۇشىپ كەلدى. اۋزى كۇيگەن ۇرلەپ ىشەدى دەمەكشى، ونى دا ميگراتسيالىق پوليتسياعا جىبەردىم. وعان دا انىقتاما بەرمەدى. ءبىراق ونىڭ جولى بولىپ، قازاقستاننان امان-ەسەن كەتتى. وكىنىشكە وراي، مۇنداي وقيعالار بولىپ تۇرادى. بار ماسەلە ادامنىڭ جولى بولعىشتىعىندا ما دەگەن وي كەلەدى.