استانادا 4- حالىقارالىق قارۋ-جاراق كورمەسى اشىلدى - فوتو
ەلىمىزدىڭ قورعانىس سالاسىنداعى ەڭ اۋقىمدى جانە سۇرانىسقا يە كورمەدە قازاقستان ءوزىنىڭ قورعانىس ونەركاسىبىندەگى تىڭ جەتىستىكتەرىن پاش ەتپەك.
بيىلعى ءتورتىنشى اسكەري كورمەنىڭ اۋماعى 90000 شارشى مەتردى قۇرايدى. كورمەگە شەت مەملەكەتتەردىڭ قورعانىس ۆەدومستۆولارىنان 40 دەلەگاتسيا، اسكەري تەحنيكا شىعاراتىن 350 كومپانيا قاتىسىپ وتىر.
باسا ايتا كەتەرلىگى، كورمەدە العاش رەت قازاقستاندا قۇراستىرىلعان «ارلان» اتتى بروندالعان ماشينا مەن «بارىس» بروندى ترانسپورتەرى كورسەتىلەدى. بۇل ۇرىس ماشينالارى قازاقستان قارۋلى كۇشتەرىنىڭ قاجەتتىلىگىن وتەۋ ءۇشىن وتاندىق كاسىپورىندا شىعارىلعان.
كورمەگە سونداي-اق شەتەلدىك سەرىكتەستەر مەن ەنشىلەس ۇيىمداردىڭ شىعارعان اسكەري ونىمدەرى، اتاپ ايتسا، ءارتۇرلى موديفيكاتسياداعى م ي-17 تىكۇشاعى، ت-72A، T-72ب تانكتەرى قويىلعان.
سالىستىرمالى تۇردە ايتساق، KADEX كورمەسىنىڭ ءمانى مەن مازمۇنى جىل سايىن ارتىپ كەلەدى. 2010 -جىلى كورمەگە قازاقستان مەن شەتەلدەردەن ءجۇز ەلۋ التى كاسىپورىن قاتىسسا، 2012 -جىلى ەكى ءجۇز ەلۋ ءۇش، 2014 -جىلى ءۇش ءجۇز اسكەري ءونىم شىعاراتىن كاسىپورىن قاتىسقان.
اۆتور: كەنجەكەي توقتامۇرات قىزى
