جەر رەفورماسى بويىنشا رەسپۋبليكالىق كوميسسيا جانىنان 4 جۇمىس توبى قۇرىلادى - ب. ساعىنتايەۆ

استانا. قازاقپارات - ق ر پرەمەر- ءمينيسترىنىڭ ءبىرىنشى ورىنباسارى، كوميسسيانىڭ ءتوراعاسى باقىتجان ساعىنتايەۆ جەر رەفورماسى بويىنشا رەسپۋبليكالىق كوميسسيا وتىرىسىن قورىتىندىلادى.

«مەنىڭ ويىمشا، ءبىز بۇگىن جاقسى كەڭەس وتكىزدىك. شامامەن 7 ساعات ءۇزىلىسسىز جيىن وتكىزىلدى، جەر رەفورماسى بويىنشا كوميسسياعا مۇشەلىك ەتەتىن 75 ادامنىڭ 70 قاتىستى، 5 ادام بەلگىلى ءبىر سەبەپتەرگە بايلانىستى كەلە المادى. بۇگىنگى العاشقى وتىرىستا 63 ادام ءوز ويىن ءبىلدىردى. بۇل ارينە جاقسى. باسىندا ازداپ سەنىمسىزدىك سەزىلدى، «سىزدەر بيلىك ادامىسىزدار، ءبىز قوعامدىق ۇيىمنانبىز، حالىق اتىنانبىز» دەگەن ويلار ايتتى. ءبىراق جيىن بارىسىندا بۇل اڭگىمەلەردىڭ بارلىعى سەيىلدى»، - دەدى ۆيتسە- پرەمەر جيىن سوڭىندا تىلشىلەرگە بەرگەن سۇحباتىندا.

ب. ساعىنتايەۆ كوميسسيا جانىنان ءتۇرلى بلوكتار بويىنشا 4 جۇمىس توبى قۇرىلعاندىعىن دا حابارلادى.

«ءبىز جاقسى ۇيعارىمدارعا كەلدىك، ءبىز كەلەسىدەي شەشىمدەر جاسادىق: ەندى ءبىز كوميسسيا جانىنان 4 جۇمىس توپتارىن قۇرامىز - قۇقىقتىق، ەكونوميكالىق، ءتۇسىندىرۋ جانە قاداعالاۋ بلوكتارى. كوميسسيا مۇشەلەرىنىڭ ىشىنەن وسى توپتىڭ باسشىلارى ىرىكتەلەدى. كەلەسى كوميسسيا وتىرىسىندا ءبىز وسى بلوكتار بويىنشا جۇمىس ىستەيمىز. كەلەسىدە بىزدە ناقتى اڭگىمە بولادى. ءبىز قازاقستان ازاماتتارىنا جەر ساتۋ ماسەلەسىن كوتەرەمىز. وسى بلوك اياسىندا كەلەسى جيىن وتەدى. ءبىز ءوز جۇمىسىمىزدى اياقتامايىنشا، ءار سەنبى سايىن وسىندا، وسى زالدا ساعات 10:00-دە وتىرىس وتكىزەمىز. شامامەن 5-6 وتىرىستان كەيىن، ايماقتارعا ساپارلاپ، اكىمدىك جانىنان قۇرىلعان كەڭەستەرمەن تالقىلاۋلار جۇرگىزەمىز، ولار ءبىزدىڭ وڭىرلەردەگى فيليالدار رەتىندە بولادى. اكىمدىكتەرگە بارلىعىن جەتكىزدىك، وسى وتىرىستىڭ بارلىق ماتەريالدارى ۇسىنىلادى، ستەنوگرامما جاسالدى، تىلشىلەر بۇگىن بارلىعىن كورسەتىپ وتىردىڭىزدار. ءبىز ءوز ماقساتىمىزعا قول جەتكىزدىك دەپ ويلايمىن، بارلىعى ءوز ويلارىن ايتتى، كوميسسيا مۇشەلەرىنىڭ بارلىعى اقىلمەن ءبىر شەشىمگە كەلۋگە مۇددەلى»، - دەپ اتاپ ءوتتى ول.

ب. ساعىنتايەۆتىڭ ايتۋىنا قاراعاندا، كەلەسى وتىرىستا كوميسسيا جەردى قازاقستاندىقتارعا ساتۋ، ساتپاۋ ماسەلەسىن تالقىلايدى.

«ۇسىنىستار وتە كوپ، حالىق ىشىندە ايتىلىپ جاتقاندارى دا بار. ءبىر كىسى ايتادى «جەر ساتىلماسىن» دەپ، ءبىر كىسى ايتادى «جەر ساتىلسىن» دەپ، ءبىر كىسى ايتادى «جەر شەتەلدىكتەرگە جالعا بەرىلسىن» دەپ، ءبىرى بەرىلمەسىن دەيدى. قانشا كوميسسيا مۇشەسى بار، سونشا پىكىر بولدى. ءبىراق وسىنىڭ بارلىعىن توپتاپ، ءبىر جۇيەگە كەلتىرەمىز. ول ءۇشىن اۋىل شارۋاشىلىعى مينيسترلىگى جانىنان شتاب قۇرىلدى، حاتشىلىق بار، وعان قوسىمشا وسى كوميسسيانىڭ توڭىرەگىندە ءتورت بلوكپەنەن جۇمىس توبى قۇرىلدى.

كەلەسى كوميسسيانىڭ وتىرىسىنا كەلگەندە ونىڭ مۇشەلەرى تاعايىندالادى، جۇمىس توبىنىڭ باسشىسى بەكىتىلىپ، بەرىلگەن ۇسىنىستاردىڭ بارلىعى جۇيە- جۇيەمەنەن تالقىعا تۇسەتىن بولادى.

كەلەسى وتىرىستا ءبىز «جەردى قازاقستاندىقتارعا ساتامىز با، ساتپايمىز با» دەگەن ماسەلەنى تالقىلايمىز. وعان ءبىز سىرتتان مامانداردى دا شاقىرامىز، وعان بۇگىنگى، مىسالى، سايتتاردا جازىلىپ جاتقان حالىقتىڭ ۇسىنىستارىنىڭ بارلىعى دا كىرەتىن بولادى. بۇگىن تالقىعا كەلگەن 75 ادامنىڭ پىكىرى عانا بولىپ قالمايدى بۇل. بۇكىل قازاقستان حالقىنىڭ پىكىرلەرىن جيناقتاپ، ءبىر شەشىم شىعارامىز»، - دەدى ق ر پرەمەر- ءمينيسترىنىڭ ءبىرىنشى ورىنباسارى. - ياعني ەلباسى ايتقانداي، ەڭ ءبىرىنشى، ءتۇسىندىرۋ ماسەلەسىن قولعا الامىز. ەكىنشى ماسەلەدە، وسىندا جىبەرىلگەن كەمشىلىكتەر بولسا، بارلىعىن جوندەيمىز. كوميسسيانىڭ مۇشەلەرىنىڭ بارلىعى دا وسى مامىلەگە كەلىپ وتىر».

ايتا كەتەيىك، بۇگىن استانادا جەر رەفورماسى بويىنشا كوميسسيانىڭ العاشقى وتىرىسى ءوتتى. كوميسسيا ق ر پرەزيدەنتى ن. نازاربايەۆتىڭ تاپسىرماسىمەن قۇرىلعان بولاتىن. بۇنىڭ الدىندا، مەملەكەت باسشىسى حالىق اراسىندا داۋ تۋدىرعان جەر كودەكسىنىڭ ءبىرقاتار تۇزەتۋلەرىنە موراتوري جاريالاعان.

كوميسسيا ءتوراعاسى بولىپ ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ، ونىڭ ەكى ورىنباسارى - «نۇر وتان» پارتياسىنىڭ ءبىرىنشى ورىنباسارى مۇحتار قۇل- مۇحاممەد پەن ەكىنشى ورىنباسارى (كەلىسىم بويىنشا) «جاقسىلىق» شارۋا قوجالىعىنىڭ باسشىسى، قوعام قايراتكەرى جاقسىلىق ۇشكەمپىروۆ بولىپ بەكىتىلدى.

جاڭادان قۇرىلعان قازاقستان رەسپۋبليكاسىنىڭ اقپارات جانە كوممۋنيكاتسيالار ءمينيسترى داۋرەن ابايەۆ تا كوميسسيا قۇرامىندا.

سونىمەن قاتار، «بولاشاق» جاستار قوزعالىسىنىڭ جەتەكشىسى داۋرەن بابامۇراتوۆ (كەلىسىم بويىنشا) ، «قازاقستانداعى پارلامەنتاريزمدى دامىتۋ قورى» قوعامدىق قورىنىڭ پرەزيدەنتى زاۋرەش باتتالوۆا (كەلىسىم بويىنشا)، ساياساتتانۋشى ايدوس سارىم (كەلىسىم بويىنشا) بولاتحان تايجان قورىنىڭ پرەزيدەنتى مۇحتار تايجان (كەلىسىم بويىنشا)، جالپى ۇلتتىق سوتسيال- دەموكراتيالىق پارتياسىنىڭ ءتوراعاسى جارماحان تۇياقباي (كەلىسىم بويىنشا)، «جالىن» جۋرنالىنىڭ باس رەداكتورى مۇحتار شاحانوۆ (كەلىسىم بويىنشا) جانە تاعى باسقا ادامدار كوميسسيا قۇرامىنا ەندى.

اۆتور: رۋسلان عابباسوۆ