16:06, 30 - قاڭتار 2016 | GMT +5
شۆەيتساريا مالايزيادان جوعالعان 4 ميلليارد دوللاردى تابۋعا كومەك سۇرادى
استانا. قازاقپارات - شۆەيتساريا پروكۋراتۋراسى مالايزيا بيلىگىنە ەلدىڭ مەملەكەتتىك دامۋ قورىنان ءتورت ميللياردقا جۋىق دوللاردىڭ جوعالۋىن تەرگەۋدە كومەك كورسەتۋ تۋرالى رەسمي سۇراۋىن جىبەردى.
شۆەيتساريالىق تەرگەۋشىلەردىڭ ەسەپتەۋىنشە، اقشانى شۆەيتساريانىڭ ەسەپشوتتارىنا كەيبىر بۇرىنعى مالايزيالىق شەنەۋنىكتەر اۋدارعان.
مالايزيانىڭ پرەمەر-ءمينيسترى نادجيب رازاك ونىڭ ەسەپشوتتارىنا دامۋ قورىنان ءىرى اقشا سوماسىنىڭ تۇسكەنىن بىرنەشە رەت جوققا شىعارعان.
سەيسەنبى كۇنى ەلدىڭ باس پروكۋرورى پرەمەردەن جەمقورلىق تۋرالى كۇدىكتەر الىنىپ تاستالاتىنى، ال ونىڭ ەسەپشوتىنا اۋدارىلعان 681 ميلليون دوللار - ساۋد ارابياسىنداعى كورولدىك وتباسىنىڭ قايىرىمدىلىعى ەكەنىن حابارلادى، دەپ جازادى BBC.
