قاراقات ءابىلدينا سال اۋرۋىنان ايىعىپ كەلە جاتقان 4 جاسار قىزدىڭ تۇساۋىن كەستى - فوتو

سەبەبى، وسى ورتالىقتا قالعان 18 بالامەن بىرگە ءۇش اي ەم قابىلداعان التى جاسار ارنۇر مەن 4 جاستاعى اياۋلىم ساۋىقتىرۋ شارالارىن ءساتتى اياقتاپ، اياقتارىن باستى. بالالار سەرەبرالدى سال (د س پ) اۋرۋىنا شالدىققان ارنۇر مەن اياۋلىم ءۇشىن بۇل العاشقى قادامدارى ماتەريالدىق تۇرعىدا دا، مورالدىق تۇرعىدا دا ارزانعا تۇسپەگەنى انىق.
«ءبىز ءۇشىن د س پ دياگنوزى بار ءار بالانىڭ باسىن كوتەرگەنى، الاقانىن اشقانى، ءتاي- ءتاي باسقانى - ۇلكەن جەڭىس. ءبىر سايكەستىكتى ايتايىن، ورتالىعىمىز ەندى اشىلعان كەزدە ساۋىقتىرۋ ەمدەرىن قابىلداپ، ەڭ ءبىرىنشى اياعىن باسقان بالا ول اياۋلىمنىڭ سىڭارى، ءتورت جاستاعى ارايلىم دەگەن قىز بالا ەدى. مىنە، ارادا 1,5 جىل وتكەن سوڭ ارايلىمنىڭ ارتىنان سىڭارى اياۋلىم ەرىپ وتىر»، - دەيدى «قاسيەتتى جول» قورىنا قاراستى بالالاردى وڭالتۋ ورتالىعىنىڭ ديرەكتورى اينۇر نۇرقوجايەۆا.
تاعى ءبىر اتاپ وتەرلىك جاڭالىق، «قاسيەتتى جول» قايىرىمدىلىق قورى وسى جىلدىڭ ءساۋىر ايىندا «سەسنا- استىق» كونسەرنى» ج ش س- مەن بىرلەسە وتىرىپ، سال اۋرۋىنا شالدىققان بالالارعا كومەكتەسۋ ءۇشىن ارنايى اكتسيانى قولعا العان. اكتسيا شارتى بويىنشا، سىرتىندا «بالالارعا دەنساۋلىق سىيلايىق» اتتى جازۋى بار 400 گرامدىق «سەسنا» ماكوروندارىنىڭ ءاربىر ساتىلعان قورابىنان 1 تەڭگە قايىرىمدىلىق قورعا اۋدارىلىپ وتىرادى. ءساۋىر ايىنان بەرى وسى اكتسيا اياسىندا جينالعان 400 مىڭ تەڭگە ەكىباستۇز قالاسىندا تۇراتىن بەس جاسار مانسۇردىڭ استاناعا كەلىپ، ەكى رەت ەم الۋىنا جانە جاتىپ- تۇرۋىنا جۇمسالعان. ياعني، ءتورت ءجۇز مىڭ قازاقستاندىق بار بولعانى ءبىر دانا ماكارون ساتىپ الىپ، وسىنداي ۇلكەن ساۋاپتى ىسكە ۇلەس قوسقان.
«بۇگىن بالالاردى وڭالتۋ ورتالىعىندا ۇلكەن يگى شارانىڭ كۋاسى بولىپ تۇرمىن. قاراكوز بالالارىمىزدىڭ العان ەمدەرى قابىل بولىپ، اياقتارىن باسىپ جاتقانى قاتتى قۋانتىپ تۇر. دەگەنمەن، جۇرەكتىڭ وكسىپ تۇرعانى دا جاسىرىن ەمەس. سەبەبى، سال اۋرۋىنا شالدىققان بالالاردى قوعام ءالى دە بولسا شەتتەتىپ جاتاتىن جاعدايلار كەزدەسەدى. ءبىراق، ولار دا اقىل- ساناسى بار، جۇرەگى بار بالالار، تەك دەنساۋلىقتارى ساۋ بولماعانى بولماسا. سوندىقتان، ءبىزدىڭ مۋزىكالىق مەكتەپ قانداي كونسەرت وتكىزبەسە دە، وسى بالالار مەن اتا- انالارىنا ءبىرىنشى قاتاردان ورىن بەرەمىز. مەن بۇل بالالاردى دەنى ساۋ باسقا بالالاردان ءبولىپ- جارىپ قارامايمىن، سەبەبى ءاربىر بالا باقىتتى بولۋعا لايىق»، - دەيدى 4 جاستاعى اياۋلىمنىڭ تۇساۋىن كەسكەن ءانشى قاراقات ءابىلدينا.
قازاقتىڭ سالتىن ساقتاپ، الا جىپ پەن قايشىنى قولىنا العان «سەسنا- استىق» كونسەرن» ج ش س- نىڭ باس ديرەكتورى ۆلاديمير ليحەي ارنۇردىڭ تۇساۋىن كەسىپ، كۇندەلىكتى تىرلىكتە قۇنى بىلىنبەيتىن 1 تەڭگە جازىلىپ كەتۋدەن ءۇمىتىن ۇزبەگەن بالالارعا كوپ كومەكتەسەتىنىن ايتتى.
ال «قاسيەتتى جول» ساۋىقتىرۋ ورتالىعىندا ءۇش ايلىق ەم قابىلداعان كەزەكتى 20 بالانىڭ توبى قوناقتار مەن ب ا ق وكىلدەرى ءۇشىن كونسەرت قويىپ، اتا-انالارىمەن بىرگە ونەرلەرىن كورسەتتى.
اۆتور: كەنجەكەي توقتامۇرات قىزى