ن. نازاربايەۆ كاسپي ماڭى مەملەكەت باسشىلارىنىڭ 4 - سامميتىنىڭ جۇمىسىنا قاتىسۋدا
قازىرگى ۋاقىتتا كاسپي ماڭى ايماعىنىڭ 5 مەملەكەتى - ازەربايجان، يران، قازاقستان، رەسەي جانە تۇركىمەنستان باسشىلارىنىڭ شاعىن قۇرامداعى كەزدەسۋى وتۋدە.
ۇيىمداستىرۋشىلاردىڭ اتاپ وتۋىنشە، استراحاندا كاسپييدى بىرلەسىپ باسقارۋ، تەڭىزدىڭ بولاشاق قۇقىقتىق مارتەبەسىن قالىپتاستىرۋ ماسەلەلەرى قارالادى دەپ جوسپارلانۋدا. سونداي-اق بۇعان دەيىنگى سامميتتەردە قابىلدانعان شەشىمدەردىڭ ورىندالۋى، وسىنداي فورماتتاعى «كاسپي بەستىگىنىڭ» كەلەسى كەزدەسۋىنە دەيىنگى دامۋ باسىمدىقتارى تالقىلانباق.
اقوردانىڭ باسپا ءسوز قىزمەتىنىڭ مالىمەتتەرىنە سايكەس، فورۋم قورىتىندىسى بويىنشا ءبىرقاتار قۇجاتتارعا قول قويىلادى دەپ كۇتىلۋدە: كاسپيي تەڭىزىنىڭ گيدرومەتەورولوگياسى بويىنشا ىنتىماقتاستىق ورناتۋ تۋرالى، كاسپي تەڭىزىنىڭ الابىندا توتەنشە جاعدايلار تۋىنداعان جاعدايداعى ءوزارا ءىس- قيمىل جاساۋ تۋرالى، سونداي-اق بيورەسۋرستارىن ساقتاۋ مەن قورعاۋعا ارنالعان كەلىسىمدەر، ازەربايجان رەسپۋبليكاسى، يران يسلام رەسپۋبليكاسى، قازاقستان رەسپۋبليكاسى، رەسەي فەدەراتسياسى پرەزيدەنتتەرىنىڭ مالىمدەمەسى.
سامميتكە ازىرلەنگەن پرەزيدەنتتەردىڭ مالىمدەمەلەرىنىڭ جوباسىندا ايماقتىق دەرجاۆالاردان تىس وزگە ەلدەردىڭ قارۋلى كۇشتەرىنىڭ كاسپيي تەڭىزىندە بولۋىنا جول بەرمەۋدىڭ ماڭىزدىلىعى اتاپ وتىلەدى.
بەس جاقتى ساۋدا-ەكونوميكالىق ىنتىماقتاستىققا ەرەكشە كوڭىل ءبولۋ جوسپارلانعان. ونىڭ الەۋەتى تولىق پايدالانىلىپ وتىرعان جوق. ەنەرگەتيكا جانە كولىك سالالارىن دامىتۋعا باسىمدىق بەرۋ كوزدەلگەن.
اقوردانىڭ باسپا ءسوز قىزمەتىندە اتاپ وتكەندەي، كاسپيي تەڭىزىنىڭ قۇقىقتىق مارتەبەسى بويىنشا قازاقستاننىڭ ۇستانىمى - 1982 - جىلعى تەڭىز قۇقىعى بويىنشا ب ۇ ۇ كونۆەنسياسىنىڭ تەڭىزدىڭ ءتۇرلى اۋماقتارىنىڭ ەنى مەن رەجىمدەرىنە قاتىستى كەي ەرەجەلەرىن كاسپي تەڭىزىندە قولدانۋ.
سامميت بارىسىندا نۇرسۇلتان نازاربايەۆ ازەربايجان پرەزيدەنتى يلحام اليەۆپەن ەكىجاقتى كەزدەسۋ وتكىزەدى دەپ جوسپارلانعان.
