تايۆانداعى پويىز اپاتى: قازا تاپقاندار سانى 48 ادامعا جەتتى

تايبەي. قازاقپارات - حۋاليان ۋەزىندەگى تۋننەل ماڭىندا بولعان پويىز اپاتىنان قازا تاپقاندار سانى 48 گە جەتتى، تاعى 118 جولاۋشى اۋرۋحاناعا جاتقىزىلدى.

قۇتقارۋ جۇمىستارى جالعاسۋدا، دەپ حابارلايدى قازاقپارات TaiwanNews-كە سىلتەمە جاساپ. تەمىرجول اپاتى حۋاليان ۋەزىنىڭ اۋماعىندا تاۋ تۋننەلىنە كىرە بەرىستە ورىن العان. Taroko Express پويىزىنىڭ سەگىز ۆاگونىندا 350 جولاۋشى بولعان.

الدىن الا مالىمەتتەر بويىنشا، پويىز ەڭىستەن تومەن قاراي كەلە جاتقان قۇرىلىس ماشيناسىمەن سوقتىعىسقان. سالدارىنان ەكىنشى جانە ءۇشىنشى ۆاگون رەلستەن شىعىپ كەتكەن، تۋننەل قابىرعاسىنا سوعىلىپ دەفورماتسيالانعان. قازا تاپقانداردىڭ كوپشىلىگى سوڭعى ەكى ۆاگوننان تابىلدى، دەپ حابارلادى تايۆان تەمىرجول اكىمشىلىگى. ەل ۇكىمەتى شۇعىل كومەك ورتالىعىن قۇردى. بۇعان دەيىن تايۆانداعى پويىز اپاتىنان 36 ادام قازا تاۋىپ، 72 جولاۋشى زارداپ شەككەنى حابارلانعان بولاتىن.

اۆتور: اياۋلىم التىنبەك