تالدىقورعاندا تۇڭعىش قازاق تاريحشىسى ق. جالايريدىڭ 485 جىلدىعىنا ارنالعان كونفەرەنسيا ءوتتى - فوتو
كەشە وتكەن جيىندا الدىمەن تاريحشى عالىمنىڭ عۇمىر دەرەگى مەن قالدىرعان ەڭبەكتەرىنە قاتىستى فيلم ۇسىنىلدى.
قازاقتىڭ تۇڭعىش تاريحشىسى، قوعام قايراتكەرى، قولباسشى، ەلشى- كەڭەسشى، فيلوسوف، تاريحي پۋبليتسيستيكانىڭ نەگىزىن قالاۋشى قالامگەر رەتىندە قادىرعالي بابامىزدىڭ بەت- بەينەسى جان- جاقتى قىرىنان اشىپ كورسەتىلدى. عالىمدار الكەي مارعۇلان، شوقان ءۋاليحانوۆ، جازۋشى مۇحتار ماعاۋيننىڭ تاريحشى تۋرالى تەرەڭ زەرتتەۋلەرىنەن كەلتىرىلگەن دەرەكتەر فيلم مازمۇنىن اشا ءتۇستى.
كونفەرەنسيانى تالدىقورعان قالاسىنىڭ اكىمى ەرمەك الپىسوۆ كىرىسپە سوزىمەن اشىپ، وتكىزىلىپ وتىرعان شارانىڭ ءمانى مەن ماڭىزىنا توقتالىپ ءوتتى.
د. قونايەۆ ۋنيۆەرسيتەتىنىڭ رەكتورى، حالىقارالىق قادىرعالي بي جالايىر قوعامدىق قورىنىڭ پرەزيدەنتى، زاڭ عىلىمدارىنىڭ دوكتورى، پروفەسسور ءومىرالى شاقاراپ ۇلى بايانداما جاساپ، قادىرعالي ءبيدىڭ تۇركى الەمىندەگى ۇلى تاريحشى ەكەندىگىنە قاتىستى وي- تولعامدارىن جەتكىزسە، فيلوسوفيا عىلىمىنىڭ دوكتورى، پروفەسسور امانجول قاسابەك قادىرعالي جالايريدىڭ دۇنيەتانىمى تۇرعىسىندا ءسوز قوزعاپ، ونىڭ ەڭبەگىنىڭ تۇپكى ماقساتى رەتىندە «تۇراقتى قوعام ىزدەۋ» يدەياسىنا كەڭىنەن توقتالدى.
سونىمەن قاتار ولكەتانۋشى، تاريحشى اندرەي بەرەزين مەن تاريحشى قۇلتاي نۇرقالباي ۇلى بايانداما جاسادى.
