جىل باسىنان بەرى 47 قازاقستاندىق شەتەلدە تەگىن ەمدەلگەن

نۇر- سۇلتان. قازاقپارات - 2020 -جىلدىڭ باسىنان بەرى الەۋمەتتىك مەديتسينالىق ساقتاندىرۋ قورى ق ر دەنساۋلىق ساقتاۋ مينيسترلىگى كوميسسياسىنىڭ شەشىمىمەن شەتەلگە ەمدەلۋگە 47 پاتسيەنتتى جىبەردى: 31 ادام قاجەتتى كومەكتى تولىق كولەمدە الدى، 16 قازاقستاندىق ەمىن جالعاستىرىپ جاتىر، دەپ حابارلايدى قازاقپارات.

تاعى بەس پاتسيەنت ەمدەلۋگە جولداما كۇتۋدە، سەبەبى اۋرۋحاناعا جاتقىزۋ كۇنى كەشىرەك بەلگىلەنگەن. 2020 -جىلدىڭ 1 - قازانىنداعى جاعداي بويىنشا الەۋمەتتىك مەديتسينالىق ساقتاندىرۋ قورى شەتەلدىك كلينيكالارمەن 787 ميلليون تەڭگە سوماعا شارت جاساستى. قاراجات تۋىس ەمەس دونوردان سۇيەك كەمىگىن ترانسپلانتتاۋدى جۇرگىزۋگە، اعزالاردى ترانسپلانتتاۋعا، ستەرەوتاكسيكالىق راديوتەراپياعا/راديوحيرۋرگيالىق ەمدەۋگە، پروتوندىق تەراپياعا باعىتتالعان. وسىلايشا، شەتەلدە ەمدەلەتىن نەگىزگى اۋرۋلار ترانسپلانتاتسيا، ونكوگەماتولوگيا جانە جەكە ورگانداردىڭ ونكولوگياسى پروفيلدەرىنە جاتادى.

«قازاقستاندىقتار 2012 -جىلدان باستاپ بيۋدجەت ەسەبىنەن شەتەلگە ەمدەلۋگە بارادى. بۇل باعدارلاما ءبىزدىڭ ەلىمىزدە ءالى دامىماعان نەمەسە وتكىزىلمەگەن جوعارى تەحنولوگيالىق قىزمەت تۇرلەرىن الۋ مۇمكىندىگىن قامتاماسىز ەتۋ ءۇشىن قۇرىلعان»، - دەپ اتاپ ءوتتى الەۋمەتتىك مەديتسينالىق ساقتاندىرۋ قورى.

ازاماتتاردى شەتەلگە ەمدەلۋگە جىبەرۋ تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جۇزەگە اسىرىلادى. مەملەكەت سونداي- اق پاتسيەنتتىڭ جانە ونىڭ الىپ جۇرۋشىلەرىنىڭ كولىك شىعىندارىن وتەيدى. باعدارلاما پاتسيەنتتەر جەكە قاراجاتى ءۇشىن شەتەلدىك مەديتسينالىق كلينيكالارعا ەمدەلۋگە باراتىن جاعدايلارعا قولدانىلمايدى. شەتەلدە ەمدەۋدىڭ ورىندىلىعى تۋرالى ماسەلەنى قاراۋ ءۇشىن پاتسيەنت رەسپۋبليكالىق دەنساۋلىق ساقتاۋ ۇيىمىنا (ع ز ي، مەديتسينالىق ورتالىق) جۇگىنۋى قاجەت، ول پاتسيەنتتى شەتەلگە ەمدەلۋگە جىبەرۋ تۋرالى قورىتىندى شىعارادى، قۇجاتتار پاكەتىن ءا م س ق بازاسىندا جۇمىس ىستەيتىن شەتەلدە ەمدەۋدى ۇيىمداستىرۋ جونىندەگى كوميسسيانىڭ جۇمىس ورگانىنىڭ قاراۋىنا ۇسىنادى.

جۇمىس ورگانى تۋرالى اقپاراتتى مىنا سىلتەمەدەن تابۋعا بولادى. سوڭعى شەشىمدى القالى ورگان بولىپ تابىلاتىن دەنساۋلىق ساقتاۋ مينيسترلىگىنىڭ ساراپتاما كوميسسياسى قابىلدايدى. شەتەلدە ەم قابىلداۋعا ۇمىتكەر پاتسيەنتتەر قۇجاتتارىن قاراستىرۋ كەزەڭدەرىن ءوز ءوتىنىم كودتارى ارقىلى كوميسسيا جۇمىس ورگانىنىڭ بولىمىندە قاداعالاي الادى. پاتسيەنتتەرگە ءوتىنىم كودى ولاردىڭ قۇجاتتارى جۇمىس ورگانىنا تۇسكەن ۋاقىتتا جۇمىس ورگانى قىزمەتكەرلەرىمەن بەرىلەدى.

قازاقستان رەسەي، بەلارۋس، تۇركيا، وڭتۇستىك كورەيا، ءۇندىستان، گەرمانيا، يسپانيا جانە ت. ب. الدىڭعى قاتارلى بەيىندى كلينيكالارمەن ىنتىماقتاستىق ورناتقان. شەتەلدىك مەديتسينالىق ۇيىمدى تاڭداۋداعى نەگىزگى كريتەرييلەر - قاجەتتى ەمدەۋ باعدارلاماسىنىڭ بولۋى، ەمدەۋدىڭ يننوۆاتسيالىق ادىستەرىن پايدالانۋ، باعا ساياساتى. بۇدان باسقا، بۇل باعدارلاما رەسپۋبليكالىق مەديتسينالىق ۇيىمدار بازاسىندا قازاقستاندا جوعارى تەحنولوگيالىق مەديتسينالىق قىزمەتتەردىڭ دامۋىن ىنتالاندىرادى. تارتىلعان شەتەلدىك ماماندار جەرگىلىكتى دارىگەرلەرگە شەبەرلىك ساباقتارىن وتكىزەدى.

جىل سايىن بيۋدجەت قاراجاتى ەسەبىنەن شەتەلگە ەمدەلۋگە 100-دەن استام پاتسيەنت جىبەرىلەدى، شەتەلدىك مامانداردى تارتا وتىرىپ، ماستەر- كلاستار شەڭبەرىندە وتاندىق مەديتسينالىق ۇيىمداردا ەمدەلۋگە 30-دان استام پاتسيەنت جىبەرىلەدى.

اۆتور: بالنۇر قوجاگەلدى