قازاقستان مەن تۇركيا كاسىپكەرلەرى 472,6 ميلليون دوللارعا مەموراندۋم بەكىتتى
قازاقستان-تۇرىك بيزنەس فورۋمىنىڭ قورىتىندىسى بويىنشا تاراپتار اگروونەركاسىپتىك كەشەن، دەنساۋلىق ساقتاۋ، ماشينا جاساۋ، مەتاللۋرگيا، جەڭىل ونەركاسىپ، لوگيستيكا جانە تۋريزم سالاسىنداعى جوبالاردى ىسكە اسىرۋ بويىنشا 10 قۇجاتقا قول قويدى.
ولاردىڭ اراسىندا الماتى قالاسىندا ەكىنشى فارماتسيەۆتيكا زاۋىتىن سالۋ تۋرالى كەلىسىم، نۇر-سۇلتان قالاسىندا مەديتسينالىق جانە يندۋستريالىق رەسپيراتورلار شىعاراتىن زاۋىت تۋرالى كەلىسىم، الماتى قالاسىنداعى اۆتوجولدارعا ارنالعان مەتالل بولات كونسترۋكتسيالارىن ءوندىرۋ زاۋىتى كەلىسىمى جانە نۇر-سۇلتان قالاسىندا ساۋدا، ويىن-ساۋىق ورتالىعىن سالۋ تۋرالى كەلىسىم بار.
«تۇركيا مەن قازاقستان - بەكەم بايلانىستارى بار باۋىرلاس ەكى حالىق، سونىمەن قاتار ءدىني جانە تىلدىك قۇندىلىقتارىمىز دا بار. ەكى ەل اراسىنداعى دوستىق بايلانىستار بارلىق جاعىنان دامىپ كەلەدى. بۇگىنگى كاسىپكەرلەرىمىز بەكىتەتىن كەلىسىمدەر ەكونوميكالىق ىنتىماقتاستىعىمىزدىڭ مەحانيزمدەرىن ودان ءارى نىعايتاتىنىنا سەنەمىز. قاڭتار وقيعالارى كەزىندە دە وسى ىنتىماق- بىرلىگىمىزدىڭ ىرگەسى سوگىلمەيتىنىن كوردىك. ءاردايىم ءبىر-بىرىمىزگە قولداۋ كورسەتىپ، ورتاق جوبالار جالعاسا بەرەدى دەپ ويلايمىز»، - دەدى تۇركيا رەسپۋبليكاسىنىڭ ۆيتسە-پرەزيدەنتى ف. وكتاي «Rixos President Astana» قوناق ۇيىندە وتكەن قازاقستان-تۇركيا بيزنەس-فورۋمىندا.
ءوز سوزىندە فۋات وكتاي تۇركيا الەمدەگى ۇلكەن ەكونوميكالاردىڭ ءبىرى ەكەنىن اتاپ ءوتتى.
«پاندەميا كەزىندە تۇركيا مەملەكەتتىك سالادا، جەكە سالادا دا ەكونوميكاسىن ءارى قاراي جالعاستىرا بەردى. ءبىزدىڭ ەكونوميكامىز 11 پايىزعا دامىپ، سوڭعى 10 جىلداعى ەڭ جوعارى كورسەتكىشكە جەتتى. ءبىزدىڭ ەكسپورتتىق ۇلەسىمىز دە جاقسى دامىپ كەلەدى. تۇركيانىڭ ەكسپورتى سوڭعى 21 جىل ىشىندە العاشقى رەكوردتىق دەڭگەيگە جەتتى. بۇل الدىڭعى جىلعا قاراعاندا 56 ميلليارد دوللارعا ارتىپ، 225 ميلليارد دوللارعا جەتتى. سىرتقى ساۋدادا دا كورسەتكىشتەر 2021-جىلى شامامەن 500 ميلليارد دوللارعا جەتتى. قازاقستاندا كورشىلەس ەلدەرمەن سالىستىرعاندا مىقتى نارىق ورتالىعى بولۋعا الەۋەتى بار. وسى مۇمكىندىكتى جاقسى پايدالانۋ كەرەك»، - دەدى تۇركيا رەسپۋبليكاسىنىڭ ۆيتسە-پرەزيدەنتى.
ونىڭ ايتۋىنشا، قازاقستاندا تۇرىك فيرمالارى دايىن كيىمنەن ءدارى يندۋسترياسىنا دەيىن ءتۇرلى جوبالاردى جۇزەگە اسىرىپ كەلەدى.
«تۇرىك مەردىگەرلەرى قازاقستاندا 27 ميلليارد دوللار دەڭگەيىندە 508 جوبادا ءوز قولتاڭباسىن قالدىرعان. كاسپي تەڭىزىندە 750 ميلليون دوللارلىق جوبا بار، 650 ميلليون دوللارلىق ەكسپو عيماراتىنىڭ جوباسى، ودان باسقا «اقتوعاي مىس» كەشەنى سەكىلدى ۇلكەن جوبارلاردا مەردىگەرلىك جاسادى. وعان قوسا 11 اي سەكىلدى قىسقا عانا ۋاقىتتا اياقتالعان تۇركىستان حالىقارالىق اۋەجايى بار. بۇلار دا تولىقتاي تۇرىك ينۆەستيتسياسى ارقىلى جۇزەگە استى. قاڭتار وقيعالارىنان كەيىن دە قازاقستانداعى تۇرىك فيرمالارىنىڭ ىنتىماقتاستىعى سەنىمدى تۇردە جالعاسىپ جاتىر. وسى ماسەلەدە ينۆەستورلار مەن ينۆەستيتسيالاردى قورعاۋعا ق. توقايەۆ بەرگەن كەپىلدەمەلەرى دە ۇلكەن ماڭىزعا يە. سوندىقتان قازاقستانعا تۇرىك كاسىپكەرلەرى اتىنان العىسىمدى بىلدىرگىم كەلەدى»، - دەدى ف. وكتاي.
ايتا كەتەيىك، ەلوردادا تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي مىرزانىڭ قازاقستان رەسپۋبليكاسىنا ساپارى شەڭبەرىندە قازاقستان-تۇركيا بيزنەس-فورۋمى ءوتىپ جاتىر.
پاندەمياعا قاراماستان ءۇشىنشى جىل قاتارىنان قازاقستانعا تۇركيادان رەكوردىق كولەمدە ينۆەستيتسيالار سالىپ كەلەدى.
ق ر پرەمەر- ءمينيسترى ءاليحان سمايىلوۆ قازاقستان- تۇركيا بيزنەس-فورۋمىندا بىرلەسىپ جۇمىس ىستەۋگە ءتيىمدى بولاتىن ءبىرقاتار سالانى اتاعان ەدى.
