تۇركيادا بيىل 45 ميلليون دەمالۋشىنى قابىلداۋ جوسپاردا بار
الايدا ۋكرايناداعى جاعداي جوسپارعا وزگەرىستەر ەنگىزۋى مۇمكىن. سەبەبى جىل سايىن مۇندا رەسەيدەن شامامەن 7 ميلليون، ۋكراينادان 3 ميلليون ساياحاتشى كەلەتىن. الايدا بيىل ۇشاق تاپشىلىعى ماسەلەسى تۋىنداپ، انادولى 2,5 ميلليون رەسەيلىك تۋريستتەن قاعىلۋى مۇمكىن. قازىر انتالياعا اپتا سايىن 450 اۋە ساپارى ورىندالادى. ال بىلتىر ەكى ورتادا ءبىر تاۋلىكتىڭ وزىندە 160 ۇشاق قاتىنايتىن. ونىڭ ۇستىنە ماسكەۋگە قارسى سانكسيالار سالدارىنان تولەم جاساۋ جاعى دا قيىنداعان. ويتكەنى رەسەي SWIFT جۇيەسىنەن اجىراتىلعان.
تۇركيا قازاقستاندىق تۋريستەر اراسىندا دا تانىمال باعىت سانالادى. سەبەبى بۇل ەلدە وتباسىمەن دەمالۋ ءۇشىن قولايلى جاعداي جاسالعان. وزگە مەملەكەتتەرمەن سالىستىرعاندا، باعاسى دا قولجەتىمدى. وتانداستىرىمىز اراسىندا مىسىرداعى دەمالىس ورىندارىنا سۇرانىس جوعارى. بيىل ەگيپەتتىڭ ءبىرقاتار قالاسىنا قازاقستاننان تىكەلەي اۋە رەيستەرى اشىلدى. بۇل تاريحي جەرلەردى ارالاپ، تەڭىز جاعاسىندا تىنىعۋدى تاڭدايتىندار قاتارىنىڭ ارتۋىنا سەپتىگىن تيگىزدى.
قازاقستاندىقتار كوپ دەمالاتىن مەملەكەتتەردىڭ ۇشتىگىنە بىرىككەن اراب امىرلىكتەرى دە كىرەدى. كوروناۆيرۋسقا قاتىستى شەكتەۋلەر بىرتىندەپ الىنا باستالعالى ەۋروپا ەلدەرىمەن دە بارىس- كەلىس قايتا جاندانىپ كەلەدى. الايدا پ ت ر- تەست، ۆيزالىق ماسەلەلەر جانە تىكەلەي رەيستەردىڭ از بولۋىنا بايلانىستى مۇنداي ەلدەردى تاڭدايتاندار ازىرگە كوپ ەمەس. سالا وكىلدەرى بيىل بارلىق باعىت بويىنشا تۋريستىك پاكەتتەر قىمباتتاعانىن ايتادى. وعان الەمدە ينفلياتسيانىڭ ءورشۋى سەبەپ.
مۋنيرام احمەتوۆا، «قازاقستان تۋريزم يندۋسترياسى» قاۋىمداستىعىنىڭ ءتورايىمى:
- تۇركيانى مىسالعا الاتىن بولساق، ول جاقتا بيىل كوممۋنالدىق قىزمەت اقىسى، ەلەكتر ەنەرگياسى مەن سۋدىڭ باعاسى 25-35 پروتسەنتكە قىمباتتادى. قالاارالىق باعىتتار بويىنشا قاتىناۋ قۇنىنىڭ ءوزى ەكى ەسە ءوستى. وسىنىڭ ءبارى قوناق ءۇي قىزمەتىنىڭ جانە جالپى تۋريستىك پاكەتتەردىڭ قىمباتتاۋىنا اسەر ەتتى. ەگيپەت ازىرگە باعانى تۇراقتى ۇستاپ تۇر. ول ءۇشىن مىسىر بيلىگى قوناق ۇيلەرگە قارجىلاي قولداۋ كورسەتىپ جاتىر. جالپى كوروناۆيرۋس پاندەمياسىنا بايلانىستى 2020 جانە 2021 -جىلى الەمدىك تۋريزم 2 تريلليون دوللار تابىستان قاعىلعان. قازىر كوپ ەلدە سالا قالپىنا كەلە باستادى. ماسەلەن، قازاقستاندىق دەمالۋشىلار اراسىندا تانىمال باعىتتىڭ ءبىرى - گرۋزيادا بيىل تۋريزمدەگى العاشقى 5 ايدىڭ كورسەتكىشتەرى پاندەمياعا دەيىنگى دەڭگەيگە جارتىلاي جەتىپ قالعان.
