بيىل كوللەدجدەردە ءبىلىم گرانتىنىڭ سانى 45 مىڭعا ارتادى

نۇر-سۇلتان. قازاقپارات - بيىل كوللەدجدەردە ءبىلىم الۋ ءۇشىن گرانتتار سانى 45 مىڭعا ارتىپ، بارلىعى 125 مىڭ گرانت بولىنەدى، دەپ حابارلايدى قازاقپارات ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ مالىمەتتەرىنە قاراعاندا، حالىقتىڭ الەۋمەتتىك وسال توپتارىنان شىققان بالالارعا ارنايى گرانتتار قاراستىرىلعان، ول ءۇشىن «ءبىلىم تۋرالى» زاڭعا وزگەرىستەر ەنگىزىلدى. ەندى كوپبالالى وتباسىلاردان شىققان بالالارعا - گرانتتاردىڭ %5، تولىق ەمەس وتباسىلاردان شىققان بالالارعا - %1، فيزيكالىق مۇمكىندىكتەرى شەكتەۋلى بالالارى بار وتباسىلاردان شىققان بالالارعا- %1 ءبولۋ كوزدەلگەن. وتكەن جىلى كوللەدجدەرگە قابىلداۋ 10 مىڭعا ارتىپ، 166 مىڭ ادامدى قۇرادى، ونىڭ ىشىندە 93 مىڭنان استامى مەملەكەتتىك تاپسىرىس بويىنشا (تەگىن وقۋعا) ءتۇستى، سونىڭ ىشىنەن %67 ى كۆوتالىق ساناتتار بويىنشا ءوتتى (61,9 مىڭ ادام).

«بۇگىن ءبىز تەحنيكالىق ماماندىقتارعا سۇرانىستىڭ ارتىپ كەلە جاتقانىن كورىپ وتىرمىز، بۇل تۋرالى مەملەكەت باسشىسى دا ايتتى، سوندىقتان 2025 -جىلعا دەيىن مەملەكەتتىك تاپسىرىستىڭ %70 ىن (قازىر %45) مەتاللۋرگيا، IT، قۇرىلىس، ينجەنەريا جانە قىزمەت كورسەتۋ سياقتى باعىتتار قۇرايتىن بولادى. بۇگىندە اكىمدىكتەر جانىنداعى ارنايى كوميسسيالار وڭىرلەردە سۇرانىسقا يە ماماندىقتار ءتىزىمىن جاساپ جاتىر. 30-ساۋىردەن باستاپ وبلىستاردىڭ جانە نۇر-سۇلتان، الماتى جانە شىمكەنت قالالارىنىڭ ءبىلىم باسقارمالارىنىڭ سايتتارىندا مەملەكەتتىك تاپسىرىس كوزدەلگەن ماماندىقتار تۋرالى اقپاراتپەن تانىسۋعا بولادى»، - دەلىنگەن حابارلامادا.

وسىعان دەيىن جوعارى وقۋ ورىندارىنا بەرىلەتىن گرانتتار 75 مىڭعا دەيىن ۇلعاياتىنان حابارلاعان ەدىك.