قازاقستاندا كىمدەر 45 جاسىندا زەينەتكەرلىككە شىعا الادى
بيىلدان باستاپ ايەلدەردىڭ زەينەتكە شىعۋ جاسى بىرتە- بىرتە ۇلعايتىلىپ، 10 جىل ىشىندە ەرلەرمەن تەڭەستىرىلەدى. الايدا كوپ بالالى انالار بۇرىنعىسىنشا 53 جاسىندا، 1949 جانە 1963 -جىل ارالىعىندا سەمەي پوليگونىندا كەمىندە 5 جىل تۇرعان ايەلدەر 45 جاسىندا، ەر ادامدار 50 جاسىندا زەينەتكەرلىككە شىعادى.
بۇل تۋرالى «وتىرار» ارناسىنداعى «جاڭا كۇن» باعدارلاماسىندا الەۋمەتتىك تولەۋدى ۆەدوموستۆوارالىق ەسەپتەۋ ورتالىعى وقو فيليالى ديرەكتورىنىڭ ورىنباسارى نەسىبەلى قاراجانوۆا ايتتى.
ونىڭ مالىمەتىنشە، جاڭا جىلدا بارلىق كورسەتكىشتىڭ وسۋىنە وراي زەينەتاقى، جاردەماقى تولەمدەرى قايتا يندەكستەلەدى. 2018 -جىلدىڭ 1 -قاڭتارىنان باستاپ زەينەتاقى تولەمدەرى 8 پايىزعا، قالعان بارلىق الەۋمەتتىك تولەم 6 پايىزعا كوتەرىلدى.
«مەملەكەتتىك ساقتاندىرۋ قورىنان تولەنەتىن تولەمدەر 16 پايىزعا ءوستى. بىلتىر ەڭ تومەنگى زەينەتاقى كولەمى 28148 تەڭگە بولسا، بيىل 33745 تەڭگە بولدى. بازالىق زەينەتاقى بىلتىر 12802 تەڭگە بولسا، 1 -شىلدەدە 14466، ەندى بيىلدان باستاپ 15270 تەڭگەگە كوتەرىلىپ وتىر.
بازالىق زەينەتاقى بىلتىر 45 مىڭ بولسا، 1 -قاڭتاردان باستاپ 49019 تەڭگەنى قۇرايدى. بۇل ەڭبەك زەينەتاقىسى مەن بازالىق زەينەتاقىنى قوسقانداعى ەڭ تومەنگى زەينەتاقى كورسەتكىشى.
جۇمىس ىستەپ زەينەتاقى قورىنا اۋدارعان ازاماتتاردىكى 1 -شىلدەدە 104374 تەڭگە بولسا، ەندى 1 -قاڭتاردان باستاپ ەڭ تومەنگى ايلىق كورسەتكىشتىڭ وسۋىنە (2405 تەڭگە) بايلانىستى 111 مىڭ تەڭگەنىڭ ەسەبىنەن ەسەپتەلەدى»، - دەپ ءتۇسىندىردى ول.
نەسىبەلى قاراجانوۆا 1 -قاڭتاردان باستاپ ايەلدەردىڭ جاسىنا بايلانىستى وزگەرىستەر ەنگىزىلگەنىن اتاپ ءوتتى. 1960 -جىلى تۋعان ايەلدەر بۇرىنعى زاڭ بويىنشا 58 جاستا زەينەتكەرلىككە شىقسا، ەندىگى زاڭ بويىنشا 58 جاس 6 ايدا شىعادى.
«بيىل 2018 -جىلدان باستاپ ءار جىلدا 6 ايعا كوتەرىلەدى دە، 10 جىل ىشىندە ەر كىسىلەرمەن قاتار زەينەتكەرلىككە 63 جاستا شىعاتىن بولادى. 53 جاستا زەينەتكەرلىككە شىعاتىن كوپ بالالى انالار، 1949 جانە 1963 -جىل ارالىعىندا سەمەي پوليگونىندا كەمىندە 5 جىل تۇرعان ازاماتتار بولسا، ايەلدەر 45 جاستا، ەر كىسىلەر 50 جاستا زەينەتكەرلىككە شىعادى. ولاردىڭ زەينەتكەرلىك جاسى كوتەرىلمەيدى»، - دەپ تولىقتىردى ديرەكتوردىڭ ورىنباسارى.
