باتىس ەۋروپا-باتىس قىتاي كولىك ءدالىزىنىڭ اياقتالۋىنا 457 شاقىرىم قالدى - فوتو
بۇل تۋرالى بۇگىن ق ر ينۆەستيتسيالار جانە دامۋ مينيسترلىگى اۆتوموبيل جولدارى كوميتەتىنىڭ ءتوراعاسى مەرەكە پشەمبايەۆ جوبانىڭ باس مەردىگەرلەرىنىڭ جاڭا جىلجىمالى زەرتحانانى ميينيسترلىكتىڭ بالانسىنا تابىستاۋ ءراسىمى بارىسىندا ءمالىم ەتتى.
«بۇل حالىقارالىق دالىزبەن كولىكتەر قوزعالىسىن بيىلعى جىلدىڭ سوڭىندا جۇرگىزۋدى جوسپارلاپ وتىرمىز. قازىرگى ساتتە الماتى-قورعاس، شىمكەنت-تاشكەنت، سونداي-اق، شىمكەنت-جامبىل وبلىسىنىڭ شەكاراسى ۋچاسكەلەرىندە جۇمىستار جۇرگىزىلىپ جاتىر. بۇل ۋچاسكەلەردىڭ جالپى قاشىقتىعى - 457 شاقىرىمدى قۇرايدى. ال كەلەسى جىلى وسى تاس جول جۇمىسىنا قولدانىلعان كارەرلەردە جەر قۇنارلىعىن قالپىنا كەلتىرۋ جانە باسقا دا جۇمىستار اتقارىلاتىن بولادى»، - دەدى م. پشەمبايەۆ.
ول سونىمەن قاتار، دۇنيەجۇزىلىك بانكتىڭ ەسەبى بويىنشا تاس جولدى ىسكە قوسۋ جۇك تاسىمالىن 2,5 ەسەگە ۇلعايتادى.
«جول بويىنداعى سەرۆيستىك قىزمەتتەردى دامىتۋ ارقىلى ۇلكەن مۋلتيپليكاتيۆتىك ناتيجەگە قول جەتكىزۋگە بولادى. تەك قانا كولىك قۇرالدارىن جوندەۋدىڭ وزىنەن ەلىمىزگە جىلىنا 300 ميلليون دوللار تابىس تۇسەدى دەپ كۇتىلۋدە»، - دەدى م. پشەمبايەۆ.
ايتا كەتەلىك، الداعى جىلى ەلىمىزدە رەسپۋبليكالىق ماڭىزعا يە 2,8 مىڭ شاقىرىمدىق تاس جول كۇردەلى جوندەۋدەن وتكىزىلەدى. ال بيىل 1900 شاقىرىمدىق تاس جول كۇردەلى جوندەۋدەن وتكىزىلىپ، قولدانىسقا بەرىلەدى.
ەستەرىڭىزگە سالا كەتەلىك، «باتىس ەۋروپا-باتىس قىتاي» حالىقارالىق كولىك ءدالىزىنىڭ قازاقستان اۋماعى ارقىلى وتەتىن قاشىقتىعى - 2787 شاقىرىمدى قۇرايدى.
