تۇركىستان وبلىسىنان ءبىر جىلدا 455 وتباسى سولتۇستىك وڭىرگە قونىس اۋدارعان
بۇل تۋرالى وبلىستىق ق ح ا ۇيىمداستىرۋىمەن ەلىمىزدىڭ وڭتۇستىگىنەن سولتۇستىك وبلىستارعا قونىس اۋدارۋ ماسەلەلەرى ارنالعان دوڭگەلەك ۇستەل وتىرىسىندا ايتىلدى، دەپ حابارلايدى قازاقپارات ءتىلشىسى.
باسقوسۋدا سونداي-اق «سەرپىن-2050» باعدارلاماسىن ىسكە اسىرۋ ماقساتىنداعى مەملەكەتتىك قولداۋ شارالارى دا ءسوز بولدى.
ايتا كەتەيىك، ەلىمىزدە ىشكى ەڭبەك ميگراتسياسىنا سوڭعى جىلدارى ەرەكشە كوڭىل ءبولىنىپ، سول ماقساتتا ءتيىستى جۇمىستار جۇرگىزىلۋدە. بۇل باعدارلامالار ەلباسى ن. نازاربايەۆتىڭ 2017-جىلعى قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنان باستاۋ الدى. جولداۋدا باسى ارتىق جۇمىس كۇشى بار وڭىرلەردەن باسقا جەرلەرگە، سونداي-اق، اۋىلداردان قالالارعا جۇمىس كۇشىن ۇتىمدىلىقپەن تارتۋعا قولداۋ كورسەتۋ كەرەكتىگى ايتىلعان بولاتىن.
وبلىستىق ق ح ا ۇيىمداستىرعان جيىنعا رەسپۋبليكانىڭ سولتۇستىك وڭىرلەرىنەن كەلگەن جاۋاپتى تۇلعالار، وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ وكىلدەرى، اۋدان، قالا اكىمدەرىنىڭ جاۋاپتى ورىنباسارلارى مەن ءبولىم مەڭگەرۋشىلەرى مەن ب ا ق وكىلدەرى قاتىستى. جيىن بارىسىندا ىشكى ميگراتسيانى رەتتەۋ، سولتۇستىك وڭىرلەرگە قونىس اۋدارۋشى وتباسىلارعا مەملەكەتتىك قولداۋ شارالارى مەن «سەرپىن» باعدارلاماسى بويىنشا تۇركىستاندىق تۇلەكتەردىڭ سولتۇستىك وڭىرلەردەگى جوعارى وقۋ ورىندارىنا وقۋعا ءتۇسۋ مۇمكىندىكتەرى جان-جاقتى تالقىلاندى. بۇدان وزگە سولتۇستىك قازاقستان وبلىسى اقجار اۋدانى جۇمىسپەن قامتۋ ورتالىعىنىڭ ديرەكتورى بوگەنباي جۇرىنتايەۆ، ايىرتاۋ اۋدانى جۇمىسپەن قامتۋ ءبولىمىنىڭ باسشىسى ەرلان قازبەكوۆ، تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مامانى ماليكا اسحات قىزى كۇن تارتىبىندەگى ماسەلە بويىنشا بايانداما جاساپ، قاتىسۋشىلاردى تولعاندىرعان سۇراقتارعا جاۋاپ بەردى.
تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مامانى ماليكا اسحات قىزىنىڭ ايتۋىنشا، وتكەن جىلعى مالىمەتكە سايكەس وڭتۇستىكتەن 1768 ادام سولتۇستىككە قونىس اۋدارعان.
«سولتۇستىك وبلىستارىندا حالىق از. يگەرىلمەي جاتقان اۋىلشارۋاشىلىق جەرلەرى جەتەرلىك. مەملەكەتتىك جانە بيۋدجەتتىك مەكەمەلەردە بوس جۇمىس ورىندارى بار. كاسىپ اشامىن دەگەندەرگە ءتيىمدى پايىزبەن نەسيە بولىنەدى. باستىسى قونىس اۋدارۋشىنىڭ جۇمىسقا دەگەن ىنتاسى بولسا جەتەرلىك. بۇل جوبا ميلليوندار مەكەنىندە ەكى قولعا ءبىر كۇرەك تابا الماي جۇرگەندەرگە ءتيىمدى، سەبەبى مەملەكەتتەن قولداۋ بار. قىسقاسى، قانداي ءىس باستاساڭىز دا ۇكىمەت قامقورلىعىندا بولاسىز»، - دەدى ءسوزىن قورىتىندىلادى ماليكا اسحات قىزى.