تايۆاندا «حايكۋي» تايفۋنىنان 44 ادام زارداپ شەگىپ، مىڭداعان ءۇي جارىقسىز قالدى
تايۆاننىڭ ورتالىق مەتەورولوگيالىق بيۋروسىنىڭ حابارلاۋىنشا، تايفۋن جاعالاۋداعى دۋنحە قالاسىنا جەرگىلىكتى ۋاقىت بويىنشا 15:40 شاماسىندا سوقتى. 11 قالا مەن وكرۋگتە كەم دەگەندە 7113 ادام ەۆاكۋاتسيالانىپ، 48506 ءۇي جارىقسىز قالدى.
مەتەورولوگيالىق بيۋرونىڭ مالىمەتىنشە، ەپيتسەنتردەگى جەلدىڭ جىلدامدىعى ساعاتىنا 155 شاقىرىمعا (ساعاتىنا 96 ميل) جەتكەن.
حايكۋي - تايۆانعا سوڭعى ءتورت جىلدا سوققان العاشقى تايفۋن.
مەتەورولوگيالىق بيۋرو تايفۋن سالدارىنان جاۋعان نوسەر جاڭبىر سۋ تاسقىنى مەن كوشكىندەردى تۋدىرۋى مۇمكىن ەكەنىن حابارلادى. تاۋلى حۋاليان ۋەزىندە جاۋىن- شاشىننىڭ جالپى مولشەرى 500 ميلليمەتردەن استى.
بۇعان دەيىن تايفۋن جەكسەنبى كۇنى كەشكى ساعات 17:00 شاماسىندا تايدۋن قالاسىنىڭ ماڭىنداعى جاعالاۋعا سوعادى، دەگەن بولجام جاسالدى.
جەرگىلىكتى بيلىكتىڭ حابارلاۋىنشا، جەكسەنبى كۇنى تايۆاننىڭ وڭتۇستىگى مەن شىعىسىنداعى جەتى وكرۋگ پەن قالادا مەكتەپتەر مەن كاسىپورىندار جۇمىسىن توقتاتتى.
جەكسەنبى كۇنى تايۆاننان شىعاتىن جانە تايۆانعا كىرەتىن 246 رەيس توقتاتىلدى نەمەسە كەشىكتىرىلدى.
گونكونگتا دا نوسەر جاۋىن مەن كوشكىنگە ۇلاسقان ساولا تايفۋنى سالدارىنان كەم دەگەندە 86 ادامنىڭ زارداپ شەككەنى حابارلاندى. وندا دا جۇزدەگەن رەيستەر جۇمىسىن توقتاتۋعا ءماجبۇر بولدى.
بۇعان دەيىن حايكۋي تايفۋنى حايۆانعا جاقىنداپ، مىڭداعان تۇرعىن قاۋىپسىز ايماققا كوشىرىلگەنىن حابارلاعان بولاتىنبىز.
