قازاقستان حالقى اسسامبلەياسى جىلىندا 44 مىڭ بالاعا قازاق ءتىلىن وقىتتى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ح ا ءتوراعاسىنىڭ ورىنباسارى - سەكرەتارياتتىڭ حاتشىسى ەرالى توعجانوۆ ءمالىم ەتتى.
ە. توعجانوۆ اتاپ وتكەندەي، قازاقستان حالقى اسسامبلەياسىنىڭ جىلى اياسىندا كوپ ماقساتتار كوزدەلگەن. ءبىراق، اسسامبلەيا و باستاعى جوسپارلاردى ارتىعىمەن ورىنداپ، جىلدى جەمىستى اياقتاپ وتىر.
«ءبىز جوسپاردى ارتىعىمەن ورىندادىق. مەملەكەتتىك ءتىلدى دامىتۋ باعىتىندا كەمىندە 1000 بالاعا قازاق ءتىلىن ۇيرەتەمىز دەپ جوسپارلاعان ەدىك. ال، جىل قورىتىندىسى بويىنشا 44 مىڭ بالاعا مەملەكەتتىك ءتىلدى وقىتتىق»، - دەيدى ە. توعجانوۆ.
سونداي-اق، قازاقستاندىقتارعا الەۋمەتتىك كومەك رەتىندە قازاقستان حالقى اسسامبلەياسى «مەنىڭ قازاقستانىم» اكسياسىنىڭ اياسىندا 50 مىڭنان استام ادامعا تەگىن مەديتسينالىق كومەك كورسەتكەن. ال، «قامقور» اكسياسى بويىنشا، الەۋمەتتىك از قامتىلعان وتباسىلارعا جالپى سوماسى 413 ميلليون تەڭگە كومەك كورسەتىلگەن.
اۆتور: كەنجەكەي توقتامۇرات قىزى
