مۇلىكتى زاڭداستىرۋ اياسىندا قازاقستان ەكونوميكاسىنا 43 ميلليارد تەڭگە ينۆەستيتسيا سالىندى - ق ر ۇلتتىق بانكى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ۇلتتىق بانك ءتوراعاسى دانيار اقىشيەۆ ءمالىم ەتتى.
«زاڭداستىرۋ پروتسەدۋراسى باستالعان 2014-جىلدىڭ 1- قىركۇيەگى مەن 2016-جىلدىڭ 26- قاڭتارى ارالىعىندا بانكتەردە 135 ميلليارد تەڭگە سوماعا 219 بانكتىك ەسەپشوت اشىلدى.
اتالعان سومانىڭ 90 پايىزدان استامى الماتى قالاسىندا اشىلعان ەسەپشوتتارعا سالىنعان. قارجى تەتىكتەرىن ساتىپ الۋ ارقىلى ەكونوميكاعا 43 ميلليارد تەڭگە ينۆەستيتسيا سالىندى، بيۋدجەتكە 3,1 ميلليارد تەگڭە سوماسىندا الىمدار تولەندى. 26- قاڭتارداعى بانكتەردىڭ 111 ەسەپشوتىندا قالعان قالدىق شامامەن 40 ميلليارد تەڭگەنى قۇرايدى»، - دەدى ول.
ق ر ۇلتتىق بانك ءتوراعاسىنىڭ ايتۋىنشا، 2015-جىلدىڭ جەلتوقسانى مەن 2016 -جىلدىڭ قاڭتارى ارالىعىندا زاڭداستىرۋ پروتسەدۋرالارىن جەڭىلدەتۋدىڭ، ونىڭ ىشىندە اقشانى 5 جىل ساقتاۋ جانە 10 پايىزدىق الىم تولەۋ تالابىن الىپ تاستاۋدىڭ ناتيجەسىندە بانكتەرگە قوسىمشا 50 ميلليارد تەڭگە سالىنعان.
«زاڭداستىرۋ ەرەجەسىنە وزگەرتۋلەر ەنگىزىلگەنى كوپ ۋاقىت بولا قويعان جوق. سوندىقتان الداعى ۋاقىتتا مۇلىكتى زاڭداستىرۋ ديناميكاسى اي سايىن ارتا تۇسەتىن بولادى»، - دەدى د. اقىشيەۆ.
اۆتور: مارلان جيەمباي
