الماتى وبلىسىندا 434 جاسقا جۇمىس تابىلدى

تالدىقورعان. قازاقپارات - تالدىقورعاندا جاستارعا ارنالعان بوس جۇمىس ورىندارىنىڭ جارمەڭكەسى ءوتتى.

اتالعان شاراعا وبلىستىڭ ءار جەرىنەن ديپلومدارىن قولدارىنا الىپ، جۇمىس تابامىن دەگەن ۇمىتپەن 500 گە جۋىق ادام كەلدى، دەپ حابارلايدى قازاقپارات ءتىلشىسى.

اۋرۋحانا، ءتۇرلى مەكەمەلەر مەن كاسىپورىندار جالپى سانى 400 دەن اسا بوس جۇمىس ورنىن ۇسىندى. 434 جاس جۇمىسقا ورنالاسۋعا مۇمكىندىك الدى.

ولارعا ارنايى جولداما بەرىلدى. «ەندى جاستاردىڭ جۇمىسقا تۇراقتى ورنالاسۋىن ءجىتى نازاردا ۇستايمىز. 10 كۇننەن كەيىن ءار مەكەمەگە حابارلاسىپ، مامان جايلى پىكىرلەرىن بەرەمىز. نەگىزىندە، جاستاردىڭ جۇمىسقا ورنالاسۋى ول وزدەرىنە بايلانىستى»، - دەيدى الماتى وبلىستىق جاستار رەسۋرستىق ورتالىعىنىڭ ديرەكتورى باقتيار جاقسىگەلدينوۆ.

شارانى الماتى وبلىستىق جاستار رەسۋرستىق ورتالىعىنىڭ قىزمەتكەرلەرى مەن وبلىستىق جۇمىسپەن قامتۋ ورتالىعىنىڭ وكىلدەرى بىرلەسىپ ۇيىمداستىردى. ولاردىڭ ايتۋىنشا، وڭىردە شەبەر دانەكەرلەۋشى جانە كاسىبي اسپاز تاپشى. سونىمەن قاتار، ۇيىمداستىرۋشىلار قازىرگى تاڭدا جاستار اراسىندا ەكى قولعا ءبىر كۇرەك تابۋ وزەكتى ماسەلە ەكەنىن العا تارتتى.

دەگەنمەن، وبلىستىق كاسىپكەرلەر مەن مەملەكەت تاراپىنان ۇسىنىلاتىن باعدارلامالار ارقىلى بۇل دا ءوز شەشىمىن تاۋىپ كەلەدى. ماسەلەن، جىل باسىنان بەرى جاستار تاجىريبەسىنەن 200 دەن اسا ادام وتكەن. قازىر ولاردىڭ تەڭ جارتىسى تۇراقتى جۇمىسپەن قامتىلدى.