+43 گرادۋس ىستىق بولادى: ماۋسىم ايىنا ارنالعان اۋا رايى بولجامى

استانا. KAZINFORM - «قازگيدرومەت» ر م ك سينوپتيكتەرى جازدىڭ ءبىرىنشى ايىنا ارنالعان اۋا رايىنىڭ كونسۋلتاتيۆتىك بولجامىن جاريالادى.

سينوپتيكتەردىڭ بولجامى بويىنشا، بيىلعى ماۋسىم ايىندا اۋا رايى قۇبىلمالى بولادى، تەمپەراتۋرا كۇرت وزگەرەدى.

اتموسفەرالىق اينالىمنىڭ جازعى ەرەكشەلىكتەرى سالقىن جانە ىستىق كەزەڭدەردىڭ اۋىسۋىمەن، جاڭبىرمەن جانە جەكەلەگەن كۇندەرى نايزاعاي ويناۋ، بۇرشاق ءتۇسۋ، قاتتى جەل تۇرۋ سىندى قۇبىلمالى اۋا رايىمەن سيپاتتالادى. كەيبىر كۇندەرى شاڭدى داۋىل بولادى.

ماۋسىمنىڭ ءبىرىنشى ونكۇندىگىندە تەمپەراتۋرانىڭ جوعارى بولۋىنا قاراماستان قازاقستاننىڭ بارلىق وڭىرىندە ءجيى ءارى قىسقا مەرزىمدە نايزاعاي ويناپ، جاڭبىر جاۋادى دەپ بولجانادى. تەك كەيبىر كۇندەرى تروپيكالىق اۋا ماسسالارىن سالقىن اتلانتيكالىق اۋا الماستىرىپ، تەمپەراتۋرا تومەندەيدى. مىسالى، ءبىرىنشى ونكۇندىكتە رەسپۋبليكامىزدىڭ باتىسىندا اۋا تەمپەراتۋراسى تۇندە +17+22 گرادۋس- دەن +7 + 12 گرادۋس- گە دەيىن، كۇندىز +27+32 گرادۋس- دەن +20+25 گرادۋسقا دەيىن تومەندەيدى.

اتىراۋ جانە ماڭعىستاۋ، اقتوبە جانە قوستاناي وبلىستارىندا جانە ۇلىتاۋ وبلىسىندا تۇندە سىناپ باعانى +18+28گرادۋس- دەن +12+23 گرادۋس- گە دەيىن، كۇندىز +30+38 گرادۋستەن +20+30 گرادۋسقا دەيىن تۇسەدى، ءبىراق ونكۇندىكتىڭ سوڭىندا كۇندىز تەمپەراتۋرانىڭ +25گرادۋستەن +32 گرادۋسقا دەيىن كوتەرىلەدى.

سولتۇستىك جانە ورتالىق ايماقتاردىڭ تۇرعىندارى ءۇشىن اپتاپ ىستىقتىڭ تومەندەۋى جاز ايىنىڭ ءبىرىنشى ونكۇندىگىنىڭ ورتاسىندا بولادى. تەمپەراتۋرا تۇندە +10+15گرادۋس ارالىعىندا بولادى، قيىر سولتۇستىكتە +7 گرادۋستەن +15+20 گرادۋسقا دەيىن، كۇندىز +25+30 گرادۋستەن +18+25 گرادۋسقا دەيىن وزگەرەدى.

رەسپۋبليكامىزدىڭ شىعىسىندا العاشقى ونكۇندىكتىڭ باسىم بولىگىندە تەمپەراتۋرالىق فون تۇندە +10+15گرادۋس ارالىعىن قامتىپ، وڭتۇستىكتە +20 گرادۋسقا دەيىن تومەندەيدى، كۇندىز +22+30 گرادۋس بولادى. وڭتۇستىكتە، كەرىسىنشە كۇن ىسيدى: +35 گرادۋسقا دەيىن، ءبىرىنشى ونكۇندىكتىڭ سوڭىندا، ماۋسىمنىڭ ەكىنشى ونكۇندىگىنىڭ باسىندا بۇل وڭىردە كۇن سالقىن بولادى.

ءبىراق وڭتۇستىكتە جانە جامبىل وبلىسىندا، ءتىپتى تۇنگى ۋاقىتتا دا ىستىق كەزەڭ بولادى، سىناپ باعانى كورسەتكىشتەرى +20+28 گرادۋس، كۇندىز +35+43 گرادۋسقا دەيىن جەتەدى. الايدا ءبىرىنشى ونكۇندىكتىڭ سوڭىنا قاراي اۋا تەمپەراتۋراسى ازداپ تومەندەيدى: كۇندىز +28+33 گرادۋس دەيىن.

الماتى وبلىسىندا جانە جەتىسۋ وبلىسىندا اۋا تەمپەراتۋراسى تۇندە +10+15گرادۋستەن +15+20 گرادۋسقا دەيىن، كۇندىز +20+25 گرادۋستەن +30+35گرادۋسقا دەيىن بىرتىندەپ جوعارىلايدى.