ەڭ تومەنگى كۇنكورىس دەڭگەيى: ازىق-تۇلىك ءتىزىمى 43 تەن 51 اتاۋعا دەيىن ارتتىرىلادى
بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر- ءمينيسترى اسقار ماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«ەڭ تومەن الەۋمەتتىك ستاندارتتار جانە ولاردىڭ كەپىلدىكتەرى تۋرالى» قازاقستان رەسپۋبليكاسى زاڭىنىڭ 16-بابىنا سايكەس ەڭ تومەنگى كۇنكورىس دەڭگەيى (ە ت ك د) الەۋمەتتىك قامسىزداندىرۋ سالاسىنداعى ەڭ تومەن الەۋمەتتىك ستاندارتتاردىڭ ءبىرى بولىپ تابىلادى. حالىقارالىق جانە ۇلتتىق ساراپشىلاردى تارتۋ ارقىلى جۇرگىزىلگەن زەرتتەۋ ناتيجەسىندە ە ت ك د ەسەپتەۋ ادىستەمەسىن جەتىلدىرۋ بويىنشا شارالاردى ەكى كەزەڭمەن جۇزەگە اسىرۋ قاراستىرىلدى.
بىرىنشىدەن، 2018 -جىلعى 1-قاڭتاردان باستاپ ە ت ك د-نىڭ قۇرىلىمى قايتا قارالىپ، ازىق- تۇلىك ەمەس تاۋارلارىنىڭ ۇلەسى 40 پايىزدان 45 پايىزعا دەيىن ءوستى. ناتيجەسىندە ە ت ك د مولشەرى 2017 -جىلمەن سالىستىرعاندا (24459 تەڭگەدەن 28284 تەڭگەگە دەيىن) ۇلعايدى جانە 3 ميلليون استام ازاماتتىڭ كىرىسىنە وڭ اسەر ەتتى. بۇل ماقساتقا رەسپۋبليكالىق بيۋدجەتتەن قوسىمشا 386 ميلليارد تەڭگە ءبولىندى»، - دەدى اسقار مامين.
ۇكىمەت باسشىسىنىڭ اتاپ وتۋىنشە، 2020 -جىلى ەلدەگى ەپيدەميولوگيالىق جاعدايعا بايلانىستى ە ت ك د مولشەرى 10 پايىزعا نەمەسە 29698 تەڭگەدەن 32668 تەڭگەگە دەيىن كوتەرىلدى. سايكەسىنشە، ە ت ك د مولشەرىمەن ەسەپتەلگەن الەۋمەتتىك تولەمدەردىڭ مولشەرى ۇلعايتىلدى. وسى ماقساتقا قوسىمشا 140 ميلليارد تەڭگە جۇمسالدى.
«ەكىنشىدەن، سوڭعى جىلدارى حالىقتىڭ ازىق- تۇلىك ونىمدەرىن تۇتىنۋىندا بولعان وزگەرىستەر، ەلدىڭ ازىق- تۇلىك نارىعىنىڭ ەرەكشەلىكتەرى جانە قازاق تاماقتانۋ اكادەمياسىنىڭ ۇسىنىستارى ەسكەرىلە وتىرىپ، ازىق- تۇلىك تاۋارلارىنىڭ ءتىزىمىن 43 تەن 51 اتاۋعا دەيىن ارتتىرۋ، ازىق- تۇلىك تۇتىنۋ مولشەرىنىڭ تاۋلىكتىك قۋاتتىلىعىن 2175 ككال- دان 2330 ككال-عا دەيىن كوتەرۋ ماسەلەسىن قاراستىرۋ جوسپارلانىپ وتىر. ە ت ك د-نىڭ مولشەرىن مەملەكەتتىڭ بازالىق الەۋمەتتىك تولەمدەرىن ەسەپتەۋدىڭ نەگىزى رەتىندە، تۇتىنۋ سەبەتىنىڭ ناقتى قۇنىن كورسەتە وتىرىپ، تۇراقتى نەگىزدە قايتا قاراۋ قازاقستان رەسپۋبليكاسى پرەزيدەنتىنىڭ 2018 -جىلعى 15-اقپانداعى №636-جارلىعىمەن بەكىتىلگەن قازاقستان رەسپۋبليكاسىنىڭ 2025 -جىلعا دەيىنگى ستراتەگيالىق دامۋ جوسپارىنا سايكەس جۇزەگە اسىرىلادى»، - دەدى ق ر پرەمەر-ءمينيسترى.
اۆتور: مارلان جيەمباي
