ازاماتتارعا 42500 تەڭگە الەۋمەتتىك كومەك تاعى بەرىلە مە

نۇر- سۇلتان. قازاقپارات - توتەنشە جاعداي رەجيمى كەزىندە جۇمىسسىز قالعان تولەنگەن 42500 تەڭگە الەۋمەتتىك كومەك ەندى بەرىلمەيدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«ەندى 42500 تەڭگە تولەنبەيدى. ونى جوسپارلاپ تا وتىرعان جوقپىز. 42500 الەۋمەتتىك تولەمىنە بيۋدجەتتەن قارجى قاراستىرىلماعان. مەملەكەتتىك الەۋمەتتىك ساقتاندىرۋ قورىنىڭ اكتيۆتەرىن ساتۋ ەسەبىنەن تۇسكەن قاراجات پايدالانىلعان بولاتىن»، - دەدى مينيستر ورتالىق كوممۋنيكاتسيالار قىزمەتىندەگى بريفينگ بارىسىندا.

مينيستر بۇل جۇمىستاردىڭ بارىسىندا ەڭبەك مينيسترلىگىنە ەلىمىزدىڭ ۇلتتىق بانكى كومەك كورسەتكەندىگىن باسا ايتتى.

«بۇل تۇرعىدا بىزگە ۇلتتىق بانك كوپ كومەگىن كورسەتتى. ول قور اكتيۆتەرىن ساتۋ، قارجى قۇرالدارىن جابۋ ارقىلى قاجەتتى اقشا قاراجاتىن بوساتىپ بەردى. سونىڭ ارقاسىندا مەملەكەتتىك الەۋمەتتىك ساقتاندىرۋ قورى 322 ميلليارد تەڭگە اكتيۆىن جۇمساپ، 4 ميلليون 607 مىڭ ادام 42500 تەڭگەدەن الدى. سول سەبەپتى بۇگىنگى كۇنى مەملەكەتتىك الەۋمەتتىك ساقتاندىرۋ قورىنىڭ قارجىلىق مۇمكىندىگى شەكتەلىپ وتىر. ەگەر احۋالعا بايلانىستى قانداي دا ءبىر تولەمدەر جاساۋ قاجەتتىلىگى تۋىنداپ جاتاتىن بولسا، وندا باسقا قارجى كوزدەرى تابىلىپ قالار»، - دەدى ءبىرجان نۇرىمبەتوۆ.

اۆتور: مارلان جيەمباي