كىم؟ قايدا؟ قاشان؟ - 42500 تەڭگەنى الۋ الگوريتمى

None
None
نۇر-سۇلتان. قازاقپارات - جاريالانعان توتەنشە جاعدايعا بايلانىستى 42500 تەڭگە سوماسىنداعى تولەم ەل تۇرعىندارىنا تاعايىندالىپ جاتىر جانە وسى تولەمدى العانداردىڭ سانى كۇن سايىن ارتۋدا.

قازىرگى ۋاقىتتا بۇل قاراجات مەملەكەتتىك الەۋمەتتىك ساقتاندىرۋ قورىنان (م ءا س ق) تولەنىپ جاتىر، دەپ حابارلايدى قازاقپارات.

ءوتىنىمدى قانداي رەسۋرستار ارقىلى بەرۋگە بولادى؟ توتەنشە جاعداي كەزەڭىندە الەۋمەتتىك تولەم الۋعا ارنالعان ءوتىنىمدى eGov پورتالى، 42500.enbek.kz سايتى جانە Help42500Bot Telegram-بوتى ارقىلى جىبەرۋ مۇمكىندىگى بار.

بۇل رەتتە ازاماتتار ءوتىنىم جىبەرۋ كەزىندە قاجەتتى جەكە مالىمەتتەرىن ەنگىزەدى. ازاماتتاردىڭ جەكە مالىمەتتەرىن تەكسەرۋ مەن جىبەرىلگەن ءوتىنىمدى قاراستىرۋ ءۇشىن 3 جۇمىس كۇنى مەرزىمىندە ۋاقىت كەرەك. وسىدان كەيىن مەملەكەتتىك الەۋمەتتىك ساقتاندىرۋ قورىندا تولەم جاساۋ تۋرالى شەشىم قابىلدانعاننان سوڭ، ءوتىنىم بەرۋشىگە SMS- حابارلاما كەلەدى.

كەيىننەن ءوتىنىش بەرۋشىنىڭ دەرەكتەرى «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق-عا جىبەرىلەدى. ول ونى ەكىنشى دەڭگەيدەگى بانكتەرگە تولەم جۇرگىزۋ ءۇشىن باعىتتايدى. وسى ورايدا ماماندار وتىنىشتەردى قاراۋ مەرزىمىنىڭ ۇلعايۋىنا جول بەرمەۋ ماقساتىندا ازاماتتاردان ءوتىنىمدى ءبىر رەت قانا جىبەرۋدى سۇراپ وتىر.

سەبەبى، ازاماتتار ءوتىنىمدى بىرنەشە قايتالاپ جىبەرگەن جاعدايلار دا كەزدەسۋدە.

42500 تەڭگەنى كىم الادى؟

توتەنشە جاعدايدىڭ جاريالانۋىنا بايلانىستى تابىسىنان ايىرىلعان كەلەسى ساناتتاعى ازاماتتار ايىنا 42500 تەڭگە مولشەرىندە الەۋمەتتىك تولەم الادى:

- شاعىن جانە ورتا كاسىپكەرلىك سۋبەكتىلەرىنىڭ جالاقىسى ساقتالمايتىن دەمالىستاعى قىزمەتكەرلەرى؛

- كارانتين ەنگىزىلگەن ەلدى مەكەندەردەگى ءىرى كاسىپكەرلىك سۋبەكتىلەرىنىڭ جالاقىسى ساقتالمايتىن دەمالىستاعى قىزمەتكەرلەرى؛

- مەملەكەتتىك مەكەمەلەردى قوسپاعاندا، كوممەرتسيالىق ەمەس زاڭدى تۇلعالاردىڭ جالاقىسى ساقتالمايتىن دەمالىستاعى قىزمەتكەرلەرى؛

- جەكە كاسىپكەرلەر؛

- جەكە پراكتيكامەن اينالىساتىن ادامدار (نوتاريۋس، جەكە سوت ورىنداۋشىسى، ادۆوكات، كاسىبي مەدياتور)؛

- ءبىرىڭعاي جيىنتىق تولەمدى تولەۋشىلەر بولىپ سانالاتىن جەكە تۇلعالار؛

- نىساناسى جۇمىستاردى ورىنداۋ (قىزمەتتەر كورسەتۋ) بولىپ تابىلاتىن ازاماتتىق-قۇقىقتىق سيپاتتاعى شارتتار بويىنشا تابىس تاباتىن، سالىق اگەنتتەرى ولار ءۇشىن مىندەتتى زەينەتاقى جارنالارىن اۋدارعان ادامدار.

مينيستر نە دەيدى؟

جاقىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قاشىقتان جۇمىس ىستەيتىن ادامدار بۇل تولەمدى الا المايتىنىن ءتۇسىندىردى.

«42500 تەڭگە رەسمي، بەيرەسمي جۇمىس ىستەپ جۇرگەن، ءبىراق توتەنشە جاعداي سالدارىنان تابىسىنان ايىرىلعان ازاماتتارعا قاراستىرىلعان. ولار - جالدامالى قىزمەتكەرلەر، شاعىن جانە ورتا بيزنەستىڭ جۇمىسكەرلەرى. ەگەر جالدامالى قىزمەتكەرلەر ءماجبۇرلى تۇردە، اقىسى تولەنبەيتىن ەڭبەك دەمالىسىنا جىبەرىلسە نەمەسە جۇمىستان شىعىپ قالسا، اتالعان تولەمدى الۋىنا بولادى. قاشىقتان جۇمىس ىستەيتىن ادامدار بۇل تولەمدى المايدى»، - دەيدى مينيستر.

سونىمەن قاتار ول جاقىندا بۇيرىققا قانداي وزگەرىس ەنگىزىلگەنىن ايتتى.

«جالدامالى قىزمەتشىلەر قاتارىنا كوممەرتسيالىق ەمەس ۇيىمداردىڭ دا جۇمىسشىلارى كىرەدى. ولار اقىسىز دەمالىسقا جىبەرىلگەن بولسا، اتالعان تولەمدى الا الادى. مەملەكەتتىك ورگاندار، كۆازيمەملەكەتتىك ۇيىمدارعا بۇل تولەم بەرىلمەيدى. الەۋمەتتىك تولەم بەرىلەتىن كەلەسى توپ - ءوز بەتىمەن جۇمىس ىستەپ جۇرگەن جەكە تۇلعالار. ولاردىڭ اراسىندا رەسمي جانە بەيرەسمي جۇمىسپەن اينالىسىپ جۇرگەندەر بار. رەسمي جۇمىس ىستەپ جۇرگەندەر - جەكە كاسىپكەرلەر، ادۆوكات، نوتاريۋس، سوت ورىنداۋشى مەن مەدياتور، فريلانسەر سياقتى جەكە پراكتيكامەن اينالىسىپ جۇرگەندەر. ولار توتەنشە جاعدايعا دەيىن ءتيىستى الەۋمەتتىك جارنا اۋدارعان بولسا، ءوتىنىش بەرۋىنە بولادى. ولاردىڭ قاتارىنا توتەنشە جاعدايعا دەيىن ءبىرىڭعاي جيناقتىق تولەمدى اۋدارعان ادامدار دا جاتادى. بەيرەسمي جۇمىس ىستەپ جۇرگەندەر - ەشقاشان ەڭبەك شارتىن جاساماعان، سالىق تولەمەگەن، الەۋمەتتىك تولەم تولەمەگەن، ءتىپتى ءبىرىڭعاي جيناقتىق تولەمدى دە تولەمەگەن ادامدار. مەملەكەت باسشىسى وسىنداي ادامدارعا دا 42500 تەڭگە تولەنۋى كەرەك ەكەنىن، ءبىراق ول ءۇشىن الدىمەن ءبىر رەت مارتەبەسىن راسىمدەۋ كەرەك ەكەنىن ايتتى. مارتەبەنى ءبىر رەت راسىمدەۋ دەگەن - ءبىرىڭعاي جيناقتىق تولەمدى تولەۋ. ونى ءبىر رەت تولەسەڭىزدەر، 42500 تەڭگەنى اي سايىن الاسىزدار. بەيرەسمي جۇمىس ىستەپ جۇرگەندەر ب ج ت- نى تولەگەننەن كەيىن كەلەسى كۇنى اتالعان پورتال ارقىلى ءوتىنىش بەرە الادى»، - دەدى ەڭبەك ءمينيسترى.


سوڭعى جاڭالىقتار