استانالىق پوليتسەيلەر كومىر قويماسىنان 42,5 كەلى ەسىرتكى تاپتى

نۇر-سۇلتان. قازاقپارات - ەلوردا پوليتسەيلەرى ارنايى وپەراتسيا بارىسىندا ءىرى كولەمدە ەسىرتكى ساقتاۋشىنى ۇستادى، دەپ حابارلايدى قازاقپارات ءتىلشىسى نۇر-سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
None
None

«ارنايى جەدەل وپەراتسيا بارىسىندا ەلوردا اۋماعىندا اسا ءىرى مولشەردە ەسىرتكى زاتتارىن وتكىزۋدىڭ ارناسى جويىلدى. ميچۋرينو كەنتىندەگى جەر ۇيدەگى كومىر ساقتاۋ قويماسىن ءتىنتۋ كەزىندە 42 كەلىدەن استام «ماريحۋانا» ەسىرتكىسى سالىنعان 4 قاپ تابىلدى. 53 جاستاعى ءۇي يەسى تابىلعان ەسىرتكىگە قاتىسىنىڭ جوقتىعىن ايتتى. جەكە ءتىنتۋ كەزىندە ونىڭ جانىنان «گاشيش» ەسىرتكىسى تابىلدى. سونداي-اق، ۇيرەتىلگەن ءيتتىڭ كومەگىمەن، 234 گرام «گاشيش» ەسىرتكىسى زاتى بار 35 تۇيىنشەك تابىلدى»، - دەلىنگەن حابارلامادا.

رەسمي اقپاراتتا ايتىلعانداي، جەدەل وپەراتسيا ناتيجەسىندە تاركىلەنگەن ەسىرتكىنىڭ جالپى سالماعى 42,5 كەلىنى قۇرادى. ول 8500 دوزانى قۇرايدى جانە ونىڭ قارا نارىقتاعى قۇنى 25 ميلليون تەڭگە.

«قازىرگى ۋاقىتتا ق ر ق ك 297-بابى 3-بولىگى بويىنشا سوتقا دەيىنگى تەرگەۋ ءجۇرىپ جاتىر. كۇدىكتى ۋاقىتشا ۇستاۋ يزولياتورىنا قامالدى. ەلوردا اۋماعىندا ەسىرتكى جەتكىزۋگە جانە وتكىزۋگە قاتىسى بار باسقا كۇدىكتىلەر انىقتالۋ ۇستىندە»، - دەيدى ۆەدومستۆودان.

وسى ورايدا قالالىق پوليتسيا دەپارتامەنتى ەسىرتكى ساتۋ، قولدانۋ، تاراتۋعا قاتىستى جايتتار تۋرالى انونيمدى سەنىم تەلەفوندارىنا حابارلاۋعا بولاتىنىن حابارلايدى. بايلانىس تەلەفونى كۇندىز 716393، تاۋلىك بويى 322222 نەمەسە 102.

ەسكە سالا كەتسەك، استانالىق ءتارتىپ ساقشىلارى بۇعان دەيىن دە اسا ءىرى كولەمدە سينتەتيكالىق ەسىرتكىنى جاسىرماق بولعان ەر ادامدى قۇرىقتاعان ەدى.

سوڭعى جاڭالىقتار