اتىراۋ مەكتەپتەرى جۇمىس ىستەمەيتىن 41 ادامعا 90 ميلليون تەڭگە جالاقى اۋدارعان
سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىستىق دەپارتامەنتى پريەۆەنتسيا باسقارماسىنىڭ باسشىسى جانىبەك قاراجانوۆتىڭ ايتۋىنشا، ءبىلىم سالاسىندا جاس ۇرپاقتى تاربيەلەۋ مەن وقىتۋعا ەلەۋلى توسقاۋىل جاسايتىن جۇيەلى سىبايلاس جەمقورلىق تاۋەكەلدەرى بار.
«بيىل ءبىلىم بەرۋ سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلدى. تالداۋ ناتيجەسىمەن 10 عا جۋىق سىبايلاس جەمقورلىق تاۋەكەلى انىقتالدى. وسىعان بايلانىستى 26 ۇسىنىم ەنگىزىلدى. اتىراۋ وبلىسىنداعى 12 مەكتەپتەن مەملەكەت يگىلىگى ءۇشىن ءىس جۇزىندە جۇمىس ىستەمەيتىن 41 «ءولى جانعا» جالاقى اۋدارىلىپ، شامامەن 90 ميلليون تەڭگە شىعىن كەلتىرىلگەنى انىقتالدى. مەملەكەتتەن قولداۋ رەتىندە بولەتىن بيۋدجەت قاراجاتى نىسانالى ماقساتى بويىنشا پايدالانىلۋعا ءتيىس. ويتكەنى، ساپالى ءبىلىم - تابىستى بولاشاقتىڭ كەپىلى»، - دەيدى جانىبەك قاراجانوۆ.
ەسكە سالا كەتەلىك، بۇدان بۇرىن اتىراۋ وبلىسىندا 81 مۇعالىم جالعان ديپلوممەن جۇمىس ىستەگەنىن حابارلاعان بولاتىنبىز.
جالعان ديپلومى بار مۇعالىمدەر مونيتورينگ كەزىندە انىقتالعان. ماسەلەن، 51 قىزمەتكەر مەكتەپكە دەيىنگى ءبىلىم بەرۋ مەكەمەلەرىندە، 30 ءمۇعالىم ورتا مەكتەپتەردە جۇمىس ىستەگەن.
«مەكتەپتەردە «ءولى جاندار» بار. قىزمەتكەرلەر مەن وقۋشىلار سانى بىردەي مەكتەپتەر ءارتۇرلى قارجىلاندىرىلعان. ءبىر قىزمەتكەر ءبىر مەزگىلدە 4-5 مەكەمەدە جۇمىس ىستەگەن. كەيبىر ءبىلىم بەرۋ مەكەمەلەرىندە باسشىلار وزدەرىنە لاۋازىمدىق جالاقىسىنا ۇستەمەاقى اۋدارىپ وتىرعان»، - دەپ حابارلاعان ەدى جانىبەك قاراجانوۆ.
