جىل سايىن 40 مىڭنان استام ادامنان قاتەرلى ىسىك تابىلادى
ونىڭ 5 مىڭى - ءسۇت بەزى، 4 مىڭعا جۋىعى - وكپە راگى. بۇل تۋرالى الماتىدا ءوتىپ جاتقان Best of ASCO Kazakhstan-2023 ونكولوگتار سامميتىندە ايتىلدى، دەپ حابارلايدى قازاقپارات ءتىلشىسى.
سامميتكە 7 ەلدەن ماماندار كەلدى.
حالىقارالىق جانە وتاندىق ساراپشىلار ونكولوگيالىق اۋرۋدى ەمدەۋ دياگنوستيكاسىنىڭ جاڭا تاسىلدەرىن تالقىلادى.
سونداي-اق، ناۋقاستاردىڭ ءومىرىن ۇزارتۋعا سەپتىگىن تيگىزەتىن مەديتسينالىق پرەپاراتتاردى تانىستىردى.
«ءۇش اي سايىن جاڭا ءدارى- دارمەك شىعىپ جاتىر. سەبەبى، فارماكولوگيا جاعىنان كوپتەگەن يممۋنمونكولوگيالىق دارىلەر شىقتى. تارگەتتىك پرەپاراتتار، سولاردى ەمدەۋ ۇدەرىسىنە قوسۋ ءۇشىن وسىنداي ۇلكەن كونگرەستەر قاجەت. ەكى كۇن بويى بىزگە ءسۇت بەزى راگى جانە وكپە راگى بويىنشا كوپتەگەن زاماناۋي اقپاراتتار بەرىلەدى. سول جاڭاشىلدىقتى وڭىردەگى ارىپتەستەرىمىز ەمدىك پروتسەستەرگە ەنگىزۋى كەرەك»، - دەيدى قازاق ونكولوگيا جانە راديولوگيا ع ز ي باسشىسىنىڭ ورىنباسارى باقىتجان وڭعاربايەۆ.
ايتۋىنشا، سوڭعى ۋاقىتتا اتالعان اۋرۋ جاس تالعاماي بارادى.
«بۇرىن ەگدە جاستاعى ادامدار شالدىقسا، قازىر 45-50 جاستاعىلاردا ءجيى كەزدەسەدى»، - دەدى ول.
