نۇر-سۇلتاننىڭ ۇزدىك ۇستازدارىنا 40 ميلليون تەڭگە تابىس ەتىلدى
قالا اكىمدىگىنەن ءمالىم ەتكەندەي، العاش رەت قالا باسشىسى اتىنان «نۇر-سۇلتان قالاسىنىڭ قۇرمەتتى پەداگوگى» مەدالىنىڭ يەگەرلەرىنە قوسىمشا 833 مىڭ تەڭگەدەن بەرىلدى.
بارلىعى پەداگوگتارعا 40 ميلليون تەڭگەدەن استام قاراجات تابىس ەتىلدى. سونىمەن بىرگە ءبىرقاتار وقۋ ورنىنا 9 ميلليون تەڭگەدەن اكىم گرانتى ۇسىنىلعان.
«ەلباسى نۇرسۇلتان ءابىش ۇلى نازاربايەۆتىڭ «ءبىلىمدى ۇرپاق» يدەياسىنا سايكەس مەملەكەت ساپالى بىلىمگە ەرەكشە كوڭىل بولەدى. ەلوردادا جىل سايىن وقۋ ورىندارىن سالىپ جاتىرمىز. بيىل سالىنعان مەكتەپتەر سانى وتكەن جىلمەن سالىستىرعاندا ەكى ەسەگە ارتىق. وسى جىلى 12 مەكتەپ سالىندى. كەلەسى جىلى تاعى سونشا مەكتەپ سالىنادى. وقۋ ورىندارىن زاماناۋي جابدىقتارمەن جابدىقتاپ، يننوۆاتسيالىق تەحنولوگيالاردى ەنگىزەمىز. مەملەكەت باسشىسى «پەداگوگ مارتەبەسى تۋرالى» زاڭعا قول قويدى.
وسى جىلدىڭ 1- قاڭتارىنان باستاپ پەداگوگتاردىڭ جالاقىسى %25، ودان ءارى 2024-جىلعا دەيىن تاعى %25 وسەدى. وتكەن جىلى ءبىز تۇرعىن ءۇي ساتىپ الۋ ءۇشىن الەۋمەتتىك جاردەماقى تۇرىندە 1 ميلليون تەڭگە كولەمىندەگى 275 سەرتيفيكاتتى وتەۋسىز نەگىزدە بولدىك. بيىل دا ۇستازدارىمىزعا تۇرعىن ءۇي جاعدايىن جاقسارتۋعا كومەكتەسەمىز. قازاقستاندىق يپوتەكالىق كومپانيامەن بىرلەسىپ 1 مىڭ الەۋمەتتىك پاتەر بەرەمىز. بۇل پاتەرلەر مۇعالىمدەرگە، الەۋمەتتىك قىزمەتكەرلەرگە، پوليتسيا قىزمەتكەرلەرىنە، دارىگەرلەرگە، ءورت سوندىرۋشىلەرگە، مادەنيەت جانە سپورت قايراتكەرلەرىنە بەرىلەدى. تۇلەكتەرگە دە قولداۋ كورسەتىلەدى. ماماندىقتى تەگىن وقۋعا 900 گە جۋىق گرانت ءبولىندى. قابىلدانىپ جاتقان شارالار جۇمىس ءۇشىن نەعۇرلىم قولايلى جاعداي جاساۋعا جانە بالالاردىڭ ساپالى ءبىلىم الىپ، باسەكەگە قابىلەتتى بولۋىنا باعىتتالعان. ءسىزدىڭ قاجىرلى ەڭبەگىڭىز ءۇشىن العىس ايتامىن!»، - دەدى ەلوردا اكىمى التاي كولگىنوۆ.
ەلوردالىق پەداگوگتارعا «حالىق العىسى»، «ەڭبەك ارداگەرى» مەدالدارى، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» جانە ءبىلىم جانە عىلىم مينيسترلىگىنىڭ «ى. التىنسارين» ءتوس بەلگىلەرى، گراموتالار جانە تاعى باسقا دا ماراپاتتار تابىس ەتىلدى.
