تولەبي اۋدانىندا نەبارى 40 مينۋتتىڭ ىشىندە ءبىر ايلىق جاڭبىر جاۋعان

تولەبي. قازاقپارات - تولەبي اۋدانىنداعى سەلدەن زارداپ شەككەن اۋماقتاردا بولعان تۇركىستان وبلىسىنىڭ اكىمى ءومىرزاق شوكەيەۆ جەرگىلىكتى دەڭگەيدەگى توتەنشە جاعداي جاريالانىپ، ارنايى شتاب قۇرىلعانىن ايتتتى، دەپ حابارلايدى قازاقپارات ءتىلشىسى.

سوڭعى اقپاراتتارعا سايكەس، تاۋلى اۋدانداعى ارىق- اتىزدار مەن قىر- سايلاردان جينالىپ اققان جاڭبىر سۋى ەلدى مەكەندەرگە جايىلعان. سالدارىنان 6 ەلدى مەكەندەگى 260 تۇرعىن ءۇيدىڭ اۋلاسىنا سۋ كىرىپ، ونداعى تۇرعىندار مەكتەپتەردە اشىلعان يەۆاكۋاتسيالىق ورتالىقتارعا كوشىرىلگەن. ازىرگە ماماندار 27 ءۇيدىڭ قۇلاۋ قاۋپى بار ەكەنىن ايتادى. توسىننان كەلگەن تابيعي اپات سالدارىن كورگەن ءوڭىر باسشىسى جۇرتتى سابىرعا شاقىرىپ، جاعداي رەتتەلەتىنىن جەتكىزدى.

« تولەبي اۋدانىندا اينالاسى 40 مينۋتتىڭ ىشىندە 1 ايلىق جاڭبىر جاۋعان. بۇل سوڭعى جىلدارى العاش رەت ورىن العان تابيعي قۇبىلىس. قاۋىپسىز اۋماققا كوشىرىلگەندەرىڭىز دۇرىس بولدى. ۇيلەردى پوليتسيا قىزمەتكەرلەرى كۇزەتەدى. ول جاعىن ۋايىمداماڭىزدار. سامان ءۇي قۇلاسا، وزدەرىڭىز ءۇشىن قاۋىپتى. بارلىق اۋداندار وسىندا كومەككە كەلىپ جاتىر» ، - دەدى ءومىرزاق شوكەيەۆ.

ءبىر تۇندە تابيعي اپاتتان زارداپ شەككەن تولەبيلىكتەرگە كورشىلەس قازىعۇرت، سايرام جانە ورداباسى اۋداندارىنان كومەك كەلىپ جەتتى. توتەنشە جاعداي قىزمەتكەرلەرى حالىقتى يەۆاكۋاتسيالاپ، ولاردى قاجەتتى زاتتارمەن جانە ىستىق تاماقپەن قامتاماسىز ەتۋدە.