اتا-انالاردىڭ 40 پايىزى بالانى تاربيەلەۋ جولدارىن بىلمەيدى - مينيستر
بۇل تۋرالى بۇگىن ق ر پارلامەنتى سەناتىنىڭ دەپۋتاتتارىمەن كەزدەسكەن ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.
«ەلباسى قاڭتارداعى جولداۋىندا بالالاردى ەرتە دامىتۋ ءۇشىن ءبىرىڭعاي باعدارلاما ەنگىزۋ تاپسىرماسىن بەردى. تاپسىرمانى ورىنداۋ ءۇشىن ءبىز بالالاردى ەرتە دامىتۋدىڭ حالىقارالىق تاجىريبەسىنە ساراپتاما جاسادىق. سونىڭ ناتيجەسىندە مىناداي جۇمىستار اتقارىلدى. بىرىنشىدەن، 1-3 جاستاعى بالالاردىڭ الەۋمەتتىك داعدىلارىن ورتالىقتاردا ۇيرەتۋ، دامىتۋ بويىنشا ءبىرىڭعاي باعدارلاما دايىندالدى. قازىرگى تاڭدا باعدارلاما ءتيىستى ورگاندارمەن كەلىسىلۋدە. 3-6 جاستاعى بالالارعا ارنالعان وقىتۋ باعدارلاماسى 2016 -جىلدان باستاپ جۇمىس ىستەپ جاتىر. ءبىزدىڭ ويىمىزشا، 1 سىنىپقا كەلگەن بالالار 100 پايىز ءبىر دەڭگەيدە دايىن بولۋى كەرەك»، - دەدى ەرلان ساعاديەۆ.
ونىڭ ايتۋىنشا، ەكىنشىدەن، ەلىمىزدە بالالاردىڭ دامۋىن باعالاۋ جۇيەسى ەنگىزىلدى. ەندى پەداگوگ ءتۇرلى كريتەريدى قولدانا وتىرىپ، ءاربىر بالانىڭ باعدارلامانى مەڭگەرۋ دەڭگەيىن باعالاۋعا مۇمكىندىك الدى.
«سونىمەن بىرگە، مينيسترلىك بالالاردى ەرتە دامىتۋدىڭ كونسەپتۋالدىق نەگىزدەرىن دايىندادى. وقۋ- مەتوديكالىق ادەبيەتتى ازىرلەدى. ولار اتا- انالارعا ارنالعان سايتتا ورنالاستىرىلعان. باستاۋىش ءبىلىم بەرۋ جۇيەسىمەن بايلانىستىرۋ ءۇشىن 1-3 جانە 3-6 جاستاعى بالالارعا ارنالعان وقۋ باعدارلاماسى مازمۇنىنا ينتەگراتسيا جاسادىق. اتا- انالارمەن زەرتتەۋلەر جۇرگىزىلدى. ەندى سول زەرتتەۋگە سايكەس، اتا-انالاردىڭ 40 پايىزى، ونىڭ ىشىندە كوپ بالالى جانە از قامتىلعان اتا- انالار بالالاردى تاربيەلەۋ جولدارىن جاقسى بىلە بەرمەيدى»، - دەدى ول.
ونىڭ اتاپ وتۋىنشە، مينينسترلىك وتباسى. ك ز دەگەن پورتال ازىرلەپ، 10500 اتا-انانى قاشىقتان وقىتقان. بۇل جۇمىستار الداعى ۋاقىتتا دا جالعاساتىن بولادى.
«قازىرگى ۋاقىتتا اتا-انالاردى وقىتۋ ءۇشىن وسى پورتالعا كەلەسى جىلدارعا ارنالعان بيۋدجەتتىك تاپسىرىس بەرۋ قاراستىرىلۋدا»، - دەدى ەرلان ساعاديەۆ.
